په ترکيه کې د افغانستان سفارت په رسمي توګه د تړل کيدو اعلان
۱۴۰۳ بهمن ۱۹, جمعه
په ترکيه کې د افغانستان سفارت له تېرو درې نيمو کلونو راهېسې د هغه کاري ډلې له خوا پر مخ وړل کيده چې د افغانستان د پخواني حکومت استازيتوب یې کاوه.
د سفارت له لوري پر ايکس شبکه نشر شوي پيغام کې راغلي دي چې د سفارت د تړلو علت د «کوربه هېواد پريکړه» وه.
اړونده موضوع: سعودي عربستان په کابل کې خپل سفارت بېرته فعال کړ
د سفارت لوري په دې پېغام کې زياته شوې: «د ۲۰۲۱م کال د اګست د ۱۵مې نیټې تر پېښو وروسته د طالبانو له لوري د سفارت د کنترولو د ناکامو هڅو او پر ديپلوماتانو او د سفارت پر کارکوونکو د دوامداره فشار او همدا شان د ترکیې حکومت د فشار له کبله [ترکیې] د بهرنيو چارو وزارت پريکړه وکړه چې د جمهوريت سفارتي ماموريت او د دې «سفارت د ديپلوماتانو» ماموريت پای ته ورسوي.»
خو پر دې اعلان سربیره هم داسې ښکاريدل چې سفارت د پنجشنبې په ورځ هم ټوله ورځ کار کاوه.
د فرانس پريس خبري آژانس په تماس نيولو سره نه د ترکیې د بهرنيو چارو وزارت او نه هم افغان ديپلوماتانو په دې اړه کومه تبصره وکړه.
اړونده موضوع: په برلین کې د افغانستان سفیر او په بن کې جنرال قونسل له دندو لاس په سر شوي
د سفارت يوه امنيتي ساتونکي وويل چې سفارت له دې کبله تړل شوی دی چې «د طالبانو د رژیم تابع نه وو.»
د ايکس په خپل پېغام کې سفارت ويلي دي چې خپل ماموريت «په افغانستان کې د خلکو په خوښه د جوړ شوي مشروع حکومت د نشتوالي له کبله» ختموي او د ترکيې له حکومت څخه یې د «تېرو کلونو د همکارۍ له کبله مننه» کړې ده.
ترکیې په کابل کې د طالبانو پر واکمنېدو سربیره هم هلته سفارت ساتلی دی او په مراز شريف او همدا شان په هرات ښار کې یې هم قونسلګرۍ فعالې دي.