په افغانستان کی احتجاجونو خونړی پیښی رامنځ ته کړی | افغانستان | DW | 02.04.2011
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

په افغانستان کی احتجاجونو خونړی پیښی رامنځ ته کړی

په امریکا متحده ایالاتو کی د یو مسیحی کشیش له خوا د مسلمانان آسمانی کتاب ته دوه اونی مخکی د اور اچولو عمل د افغانستان په دننه کی خونړی احتجاجونه را وپارول.

default

د افغانستان په احتجاجونو کي د ټېري جونز گوډاگي وسوځول سول

د ډو ورلډ آوټريچ نومي کليسا مسيحي پادري ټېري جونز د افغانستان په مزار شريف کي د ملگرو ملتونو پر دفتر بريد سخت غندلی دی. نوموړي په خپله يوه اعلاميه کي چی د فرانس پرس د خبری آژانس تری رپوټ ورکړی، ويلي دي چي: « د اسلام د دين سره د حساب او کتاب کولو وخت رارسېدلی دی.»

د نوموړی تر نظارت لاندی د مارچ په 21 د متحده ایالاتو د فلوریدا په ایالت کی Wayne Sapp مسیحی ملا د مسلمانانو دینی کتاب قرآن کریم ته اور واچاوه.

د مزار شريف وروسته د شنبې په ورځ په کندهار کي هم د احتجاجونو پر وخت تاوتريخوالي تر شپېتو څخه زياتو کسانو ته مرگ ژوبله اړولې ده. د کندهار د يوه ځايي خبريال ايوب پوپل په وينا د کندهار احتجاج د شنبې په سهار په سوليزه توگه پېل سو، خو وروسته پکښي تاوتريخوالی رامنځ ته سو:

« احتجاج د سهار په نهو بجو او پنځلسو دقيقو پېل سو. پوليسو هم دغه لاريون بدرگه کوی چي وروسته احتجاج کوونکو په ډبرو غورځولو او تاوتريخوالي لاس پوري کړی. پدې ترځ کي د پوليسو او احتجاج کوونکو تر منځ تاوتريخوالی رامنځ ته سو چي دواړو اړخونو يو پر بل گذارونه وکړه. د ولايتي چارواکو په وينا د کندهار په تاوتريخوالي کي لږ تر لږه اته کسان وژل سوي او گڼ شمېر نور ټپيان سوي دي. خو د کندهار د مرويس روغتون ډاکټران بيا وايي چي د وژل سوؤ او ژوبل سوؤ کسانو شمېر لا زيات دی.»

کندهار د افغانستان دويم ښار دی چي پکښي په متحده ايالتونو کي د اسلام د سپېڅلي ديني کتاب قرآن شريف د سوځولو پر ضد لاريونونه رامنځ ته کيږي. د جمعې په ورځ د مزار شريف په احتجاجونو کي د د ملګرو ملتو د دفتر 7 بهرني کارکوونکي او پنځه افغانان وژل سوي ول. د ملگرو ملتونو د سرمنشي بان کي مون تر څنگ د امريکا د متحده ايالتونو ولسمشر باراک اوباما او د المان د بهرنيو چارو وزير گيډو ويسټروېله د مزاري شريفي د پيښي عاملين سخت غندلي ول.

د مزار شريف د پيښي په هکله ټېري جونز په خپل غبرگون کي ويلي دي چي دغه پېښه ښيي چي د نوموړي په وينا اسلام د سولي دين ندی. ټېري جونز پر ملگرو ملتونو او پر متحده ايالتونو ږغ کړی دی چي د مزار شريف د پيښي عاملين ونيسي.

د ملگرو ملتونو سرمنشي بان کي مون د مزار شريف د پيښي په هکله خپله خواښيني څرگنده کړې او غندلی ده. د ملگرو ملتونو د امنيت شورا بيا د افغانستان پر حکومت ږغ کړی دی چي د پيښي عاملين ونيسي او سخته سزا ورته ورکړي.

پداسي حال کي چي د کندهار د والي وياند زلمي ايوبي د کندهار د تاوتريخوالي ډکو پړه پر طالبانو اچولې ده، د طالبانو وياند ذبيح الله مجاهد و رسنيو ته ويلي دي چي د مزاري شريفي د پيښو تر شا د طالبانو هيڅ لاس نه ؤ. د ځايي تلويزيون ژورنالست ايوب پوپل د المان ږغ راډيو ته وويل چي په کندهار کي احتجاجونو وروسته اوس ورځنی ژوند پر ټپه درېدلی دی:

« د کندهار په ښار کي د لاسي تليفونونو په کارونه کي اخلال رامنځ ته سوی دی او خلکو خپلو کورونو ته مخه کړېده. تجارانو خپل دکانونه تړلي دي او د ښار په واټونو کي پوليسو امنيتي گامونه پورته کړيدي. امنيتي چارواکي وايي چي امنيتي وضعه د دوی تر کنټرول لاندي ده.»

ټيري جونز چي د مسلمانانو د مقدس کتاب په سوځولو سره يې د افغانستان احتجاجونه ولمسول وايي چي دی ځان د وروستي تاوتريخوالي مسؤل نه بولي. ټېري جونز و فرانس پريس خبري آژانس ته ويلي دي چي گرچه دوی په آينده کي يو ځل بيا د قرآن پاک د سوځلو اراده نه لري خو نوموړي دا هم ويلي دي چي د او د ده ډلې هيڅ داسي کار ندی کړی چي له امله يې دی پښېمانه وي.

د يوې پوښتنې په ځواب کي ټېري جونز ويلي دي چي هو دی د نورو خلکو په شان د مرگ او د ته ورپېښ گواښ څخه بيريږي. ده زیاته کړې چي دی اولادونه لري او نه غواړي چي دغه واقعه د ژوند تر آخره پوري د ده اولادونه مصروفه وساتي.

احمدولي اڅکزی / آژانسونه

ونکی: عبدالباري حکيم

کت

اعلان