دوه مجرم افغان مهاجر له آلمان څخه اخراج شوي

د هامبورګ چارواکو ويلي دي چې دا دواړه کسان په زندان کې وو او بیا وروسته په عادي پروازونو کې د استانبول له لارې کابل ته اخراج شوي دي.

چارواکو ويلي دي چې له دوی څخه یې يو ۳۰ کلن نارينه دی چې د بدني جراحت اړولو او پر قانون پلي کوونکو مامورينو باندې د حملې په ګډون جرمونو له کبله محکوم شوی وو.

اړونده موضوع: آلمان ۲۰ تنه مجرمين په چارتر پرواز کې افغانستان ته اخراج کړي

دويم کس يو ۳۲ کلن دی چې هغه هم په تکراري ډول د بريدونو، وسله والې غلا او ګواښلو له کبله مجرم پيژندل شوی وو.

له طالبانو سره د آلمان د فدرالي حکومت لانجمنه اړيکه

د آلمان حکومت کابو يوه میاشت مخکې اعلان کړی وو چې د افغانستان او پاکستان ترمنځ د نښتو پر شديدو سربیره هم، په اوس وخت کې کابل ته د اخراج په اړه د سياست د تغیرولو کوم دليل نه ويني.

تر دې دمخه هم ۲۰ افغانان چې د جرمونو له کبله په سزا محکوم شوي ول، په يوه چارتر پرواز کې له لايپڅيګ ښاره کابل ته انتقال شوي ول.

اړونده موضوع: آلمان یو افغان او په نژدې پنځلس کلونو کې لومړنی سوريايي وګړی اخراج کړ

د آلمان د کورنيو چارو فدرالي وزارت هغه وخت ويلي ول چې دا لومړی چارتر پرواز دی چې د نورو هېوادونو له مرستې پرته او له طالبانو سره د يوه مستقيم توافق پر اساس ترتيب شوی دی.

په مخکنيو پروازونو کې قطر نقش لرلی وو.

له طالبانو سره د آلمان د فدرالي حکومت اړیکې بحثونه پارولي دي ځکه د آلمان دولت له طالبانو سره چې د ۲۰۲۱م کال په اګست میاشت کې افغانستان کې واک ته رسېدلي، هیڅ رسمي دپيلوماتيکي اړيکې نه لري. 

د طالبانو اداره د بشري حقونو په ځانګړي توګه د ښځو حقونو تر پښو لاندې کولو له کبله په نړيواله کچه منزوي دي.