1. Прескокни до содржината
  2. Прескокни до главната навигација
  3. Кон други страници на DW
Конфликти

Растат тензиите во источна Украина

СН/агенции
19 февруари 2022

Ситуацијата во источна Украина се заострува. Водачите на бунтовниците во Доњецк и Луганск се подготвуваат за војна. Украински војник е убиен од страна на проруските сепаратисти. Цивилите продолжуваат да се евакуираат.

https://p.dw.com/p/47HLi
Проруски сепаратисти на набљудувачница во регионот на Доњецк
Проруски сепаратисти на набљудувачница во регионот на ДоњецкФотографија: Kisileva Svetlana/ABACA/picture alliance

Еден украински војник загина во судирите со проруските сепаратисти, кои ги поддржува Москва на истокот на земјата, соопшти денеска украинската војска.

„Во гранатирањето од страна на сепаратистите смртно настрада еден украински војник од експлозија на граната“, соопшти воената команда за истокот на Украина.

Украинските вооружени сили и проруските сепаратисти денеска взаемно се обвинуваат за тешки прекршувања на примирјето на истокот на Украина.

Украинските резервисти се подготвуваат за евентуална руска инвазија

Украинската војска пријави дека до 7 часот утрината  66 пати бил разменет артилериски оган во близина на градовите на линијата на фронтот, со калибири 82 и 110 милиметри, што е особено висок број.  Најмалку еден војник загинал во гранатирањето.

Украинската војска наведе дека ја контролира ситуацијата и оти „ја продолжува мисијата да ги поттисне вооружените агресии на Русија“. 

Општа мобилизација на проруските бунтовници

Москва негира дека е вмешана во овој конфликт и вели дека се работи за внатрешни прашања на Украина, меѓутоа Организацијата за европска безбедност и соработка (ОБСЕ) редовно јавува, во последните 8 години од кога трае овој конфликт, дека кон сепаратискичките области преминува оружје од Русија.

Повеќе: НАТО ја зголеми борбената готовност, цивили се евакуираат од источна Украина

Сепаратистите во регионот Доњецк и Луганск, кои го обвинуваат Киев дека сака да ја поврати оваа област под своја контрола, оцениле оти ситуацијата е критична и прогласија општа мобилизација. 

Лидерот на самопрогласената „Народна Република Доњецк“, Денис Пушилин преку видео порака прогласи општа мобилизација
Лидерот на самопрогласената „Народна Република Доњецк“, Денис Пушилин преку видео порака прогласи општа мобилизацијаФотографија: DPR/dpa/TASS/picture alliance

Лидерот на сепаратистите во Доњецк, Денис Пушилин, во видео порака објави дека потпишал соодветен декет. Пушилин ги повика резервистите „да дојдат во канцелариите за воена регистрација“. Бунтовничкиот водач на Луганск, Леонид Пашечник, исто така потпишал соодветен документ.

Набљудувачите од ОБСЕ денеска јавија оти констатирале „спектакуларно зголемување“ на кршење на примирјето во оваа област и дека во петокот имало вкупно 870.

Во меѓувреме пак продолжуваат евакуациите на градовите и на населените места во регионите Луганск и Доњецк, кои започнаа во петокот. Според сепаратистите во Доњецк, повеќе од 6.000 луѓе се веќе евакуирани, меѓу кои 2.400 деца. Луѓето ќе бидат сместени во јужниот руски регион Ростов.