Пожарите уништија цели градови

Против 29 шумски пожари во Калифорнија се борат 14 илјади пожарникари. Бројот на жртви се зголемува. Во регион каде беснее пожар, во Бјут Каунти, пронајдени се седум тела, соопшти надлежниот шериф. Во средата во регионот беа пронајдени три пеплосани тела на загинати. Полицијата соопшти дека во сојузната држава Орегон, северно од Калифорнија, се пронајдени исто така две тела. Се стравува дека бројот на жртви ќе се зголемува, со оглед на тоа што многу места се комплетно отсечени од светот.

Гувернерката на Орегон, Кејт Браун, изјави дека пет града во оваа сојузна држава се „во најголем дел уништени“. Во текот на вчерашниот ден, според наводи на властите, во Орегон имало 37 пожари. Околу 500.000 луѓе, односно десет проценти од вкупното население, биле принудени на евакуација.

„Никогаш досега не сме виделе толку незапирлив оган во нашата држава“, напиша Браун на Твитер. Во пламен се повеќе од 3600 квадратни километри земја, или површина со големина колку шпанскиот остров Мајорка.

Повторноторазгорување на пожарите е поттикнато од топлотниот бран и ветрот. Во текот на наредната недела температурите конечно би требало да паднат, што би требало да донесе и извесно олеснување, соопшти противпожарната служба во Калифорнија.

Годинава во Калифорнија се уништени повеќе од 12.500 квадратни километри земја и околу 4000 згради. Веќе сега шест од актуелните пожари се вбројуваат во 20-те најголеми пожари во историјата на Калифорнија.