Трамп: Војната со Иран завршува многу скоро

Според американскиот претседател  Доналд Трамп,  војната против Иран нема да трае уште долго. Тој изјави дека „промена на режимот“ веќе е постигната и дека другите земји треба да се погрижат за безбедноста во Ормускиот Теснец. Белата куќа соопшти дека вечерва ќе се одржи негово обраќање до нацијата.

Тече петтата недела од војната против Иран, а Американците и понатаму тешко го разбираат јасниот курс на својот претседател. Националниот просек на цените на горивата  во  САД ја проби психолошки важната граница од четири долари по галон, што изнесува околу 0,92 евра за литар.

Кога новинарка во Овалниот кабинет го праша Трамп како може да се намали цената на бензинот, тој одговори дека тоа ќе се случи „веднаш штом ќе излеземе од Иран“, додавајќи дека тоа ќе биде „многу скоро“. „Мислам, две или три недели — и излегуваме“, изјави претседателот.

Изјавата изненади, бидејќи само неколку часа претходно „Вол стрит џурнал“ објави дека уште еден американски носач на авиони е испратен кон Блискиот Исток, каде што веќе дејствуваат два такви воени бродови.

Режимска промена или политички маневар?

Трамп повторно тврдеше дека САД веќе оствариле „regime change“ — смена на иранскиот режим. „Моравме малку да скршнеме од патот, бидејќи имаше еден психопат (...), кој за жал повеќе не е меѓу нас“, кажа тој, погрешно споменувајќи го убиениот ајатолах Али Хаменеи како „Хомеини“.

„Значи, веќе имавме режимска промена. Го соборивме првиот режим, па вториот. Сега таму има група луѓе што се многу поразумни“, додаде Трамп.

Џон Болтон, поранешен советник за национална безбедност, смета дека ваквите изјави не се случајни. „Трамп бара излез од ситуацијата, а овој наратив му овозможува да прогласи победа, без разлика на фактите“, изјави тој за „Ен Пи Ар“. „Не постои вистинска смена на режимот сѐ додека ајатоласите и Револуционерната гарда не бидат отстранети од власт.“

Ормускиот Теснец  — „не е наш проблем“

Трамп противречно говореше и за тоа што очекува во последните денови од конфликтот. „Ќе уништиме сѐ што имаат. Но можно е претходно да постигнеме договор“, рече тој. „Добро би било ако има договор. Но, и да не дојде — не е важно.“

Претседателот исто така изјави дека не е важно  дали Ормускиот Теснец повторно ќе биде безбеден за пловидба  кога САД ќе престанат со нападите врз Иран. „Тоа не е наша работа“, изјави тој. „Кина и другите земји ќе поминуваат, ќе си ги полнат бродовите и сами ќе се грижат за своите рути. Ние немаме причина да го правиме тоа.“

Таквите пораки навестуваат дека Трамп планира самостојно да ја заврши  војната. Американските сили би можеле едноставно да престанат со огнот и да се повлечат, независно од  ситуацијата во Ормускиот Теснец. Белата куќа најави дека претседателот вечерва ќе ѝ се обрати на нацијата со нови детали за состојбата на Блискиот Исток.

Автор: Карстен Кинтоп, АРД