Црна Гора не сака руски воени бродови во своите пристаништа

Русија беше заинтересирана да разговара со челниците на црногорската војска за можноста руски воени бродови да се стационираат во пристаништата во Бар и Котор, но министерството за одбрана на Црна Гора не сакаше ниту да разговара на оваа тема. Ова денеска (23.12.2013) го изјави рускиот амбасадор во Подгорица Андреј Нестеренко во интервју за весникот „Вијести“.

Црногорските медиуми претходно објавија дека Русија побарала од Црна Гора дозвола во Бар да инсталира своја воена база, која би била логистичка поддршка за нејзината поморска флота во Средоземието.

„Тоа не е вистинска информација. Ние не баравме отворање на воени бази. Се‘ што сакавме беше наша делегација да разговара со црногорското министерство за одбрана околу можноста руски воени бродови да пристануваат во Бар и Котор заради обезбедување на материјално-технички потреби, снабдување со гориво и продукти“, наведе Нестеренко.

„Ние побаравме состанок со преставници на војската на Црна Гора, но од министерството за одбрана ни беше речено дека оваа приказна не ги интересира“.

Медиумите претходно пренесоа дека Русија бара логистичка поддршка за својата флота во Средоземјето како алтернатива, бидејќи е неизвесно дали ќе може да ја задржи воената база во пристаништето Тартус во Сирија. Оценето е дека евентуалното прифаќање на Подгорица руска војска да се стационира во Бар би значело крај на приказната за интеграција на Црна Гора во НАТО.

Од Министерството за одбрана на Црна Гора соопштија дека во редовните комуникации кои овој ресор ги има во билатерални и мултилатерални активности, ниту во една прилика не станало збор за отворање на воени или поморски бази на територија на Црна Гора.