Орбан го брани ветото на самитот на ЕУ: „Тоа е наше право“

Унгарскиот премиер Виктор Орбан се обидува да ја оправда својата блокада на милијарди евра финансиска помош за Украина на самитот на ЕУ во Брисел. „Имаше мал проблем“, им рече тој ноќеска (19/20.03) на унгарските новинари во Брисел. „Но, правната ситуација е сосема јасна - имаме право да го сториме ова“, додаде тој, осврнувајќи се на неговата закана со вето. „Бидејќи процесот на донесување одлуки сè уште не беше завршен“, ги цитираат унгарските медиуми зборовите на Орбан.

Унгарскиот лидер всушност веќе го одобри заемот за помош за Украина на декемврискиот самит. Сега, Орбан тврди дека Украина произволно го „затворила“ нафтоводот Дружба. Преку овој нафтовод, Унгарија и Словачка се единствените земји од ЕУ кои сè уште добиваат нафта од Русија, која води брутална агресивна војна против Украина.

Конфликт со Киев како муниција за изборната кампања во Унгарија

Руски ракетен напад на крајот на јануари сериозно го оштети нафтоводот Дружба во западна Украина. Според Киев, поправките ќе потраат. Орбан сака да ја укине блокадата дури кога руската нафта повторно ќе тече во Унгарија. Десничарскиот популист се соочува со парламентарни избори во својата татковина, на кои би можел да загуби. Според набљудувачите, тој се надева дека со поттикнување на конфликт со Украина, ќе може да го намали јазот со својот противник, Петер Маѓар, до денот на изборите на 12 април.

Германскиот канцелар Фридрих Мерц го опиша однесувањето на Орбан на самитот на ЕУ како „чин на груба нелојалност“ што би имал последици. Орбан не е импресиониран од ваквите зборови и вели: „Тие малку се заканија, а потоа сфатија дека нема да функционира“, коментираше тој пред унгарските новинари за критиките од повеќето други шефови на држави и влади на ЕУ.