„Иднината на Балканот е во ЕУ“
28 ноември 2008Македонија е заситена од фразите кои пристигаат од Брисел дека Европската унија е заморена од проширувањето. Вицепремиерот за евроинтеграции, Ивица Боцевски, во прилично остар настап пред членовите на мешовиот комитет на македонски и европски парламентарци рече дека таквите пораки се лицемерие или хипокризија.
Македонија бара визна либерализиција
На првиот состанок на комитетот во Скопје, Боцевски го промовираше и Акцискиот план на Владата во однос на годишниот извештај на Европската комисија за Македонија и се осврна на либерализацијата на визниот режим за Македонија. И покрај лидерскиот статус кога се во прашање визните реформи македонските граѓани се’уште немаат гаранции кога ќе можат слободно да патуваат низ Европа.
Време е да добиеме храбри политички елити во ЕУ кои ќе се соочат со фактот дека е невозможно во срцето на Европа да има регион кој се уште не е член на Унијата, оцени Боцевски.
Престојните избори клучни за оценките за Македонија
Евроамбасадорор Ерван Фуере се обидуваше да ја разубави сликата. Во речникот на европскиот парламент нема простор за заморот од проширувањето: „Посветени сме на процесот на интеграција, која ќе ги опфати сите земји од балканскиот регион. Иднината на Балканот е во ЕУ. Извештајот на ЕК, се стреми да го долови напредокот врз основа на сите преземени и остварени активности, но ги идентификува и недостатоците“, рече Фуере.
Амбасадорот на земјата претседавач со Унијата, Франција, Бернар Валеро, потсети дека претстојните претседателски и локални избори ќе бидат клучни за идните оценки на ЕУ.
Со мешовитиот комитет претседава грчкиот европарламентарец Антониос Тракателис. Тој ниту еднаш не го спомена спорот за името, а наместо со целата референца ја нарекуваше Македонија со кратенакта ФИРОМ.
Меѓу темите за кои се зборуваше на првата сесија на мешовитиот комитет се тортурата во затворите, еколошките стандарди и проблемот со ОКТА, како и слабото искористување на ИПА фондовите од ЕУ.