Набљудувачите на ЕУ се сомневаат во победата на Карзаи
17 септември 2009
Изборната комисија во Авганистан изминативе недели делумно ги објавуваше резултатите од изборите. Сега, конечно, резулатот е познат - Хамид Карзаи има јасна предност. Како што објави Комисијата во Кабул, по пребројувањето на гласовите од сите избирачки места, актуелниот претседател освоил 54,6 проценти. Според овој резултат, Карзаи би одбегнал соочување со најголемиот противкандидат, Абдула Абдула во втор круг гласање. Но, и овојпат се работи за привремен краен резултат, предупреди шефот на набљудувачката мисија на ЕУ во Авганистан Филип Моријон: „Секој обид да се припише победата би бил неверодостоен и предвремен.“
ЕУ вели дека проблематични се 1,5 милиони гласови
Имено, сега кога изборната комисија го објави резултатот, сите очи се вперени кон друго тело: независната комисија за поднесување жалби, која е поддржувана од ОН. Таа има мандат да ги разреши спорните случаи и обвинувањата за изборна измама. Набљудувачката мисија на ЕУ сега излезе со отрезнувачко признание: „Се обидовме да предупредиме дека се можни изборни измами. Не успеавме во тоа.“ Затоа шефот на европската мисија, Моријон, смета дека не е добра постапката на изборната комисија да го објави привремениот резултат:
„Ова создава збунетост. Уште од почетокот беше планирано, официјалниот краен резултат да биде објавен кога комисијата за поплаки ќе ја заврши работата.“
Според набљудувачите на ЕУ, проблематични се околу 1,5 милиони гласови. Тоа би било повеќе од секој четврти глас. „Факт е дека во провинциите, каде што немаше набљудувачи на изборните места, гласачките кутии беа полнети со фалсификувани гласачки ливчиња“, вели Моријон.
Пребројување на 10 проценти од гласовите
Изборниот тим на претседателот Карзаи веќе ги отфрли обвинувањата на ЕУ, нарекувајќи ги еднострани, неодговорни и противуставни. Расветлувањето на случајот сега е во авганистански раце. Комисијата за поплаки веќе нареди пребројување на десет проценти од изборните места. Оваа постапка најверојатно ќе трае повеќе недели, по што граѓаните ќе знаат кој ќе биде нивниот нов претседател.
Автор: Каи Кистнер / Александра Трајковска
Редактор: Елизабета Милошевска Фиданоска