An shirya zama don kaucewa afkuwar bala'i a Idlib

Taron zai gudana ne a ranar Juma'a mai zuwa don samar da shawarwari na magance matsalar da ta kunno kai na son karbe ikon yankin na Idlib daga hannun 'yan tawayen ta hanyar amfani da karfi. Zaman da ake shirin yi a birnin Tehran na kasar Iran na zuwa ne a daidai lokacin da Amurka da Majalisar Dinkin Duniya suka yi gargadi kan daukar matakin da suka ce ka iya haifar da asarar rayuka na dubban fararen hula da ke rayuwa a wannan yankin. An dai kiyasta cewa dubban 'yan tawaye da suka tsere daga wasu sassan kasar mai fama da rikici ne ke samun mafaka a yankin.