Wani hari ya salwantar da rayuka a Kabul

'Yan sanda a Afghanistan sun ce akalla mutane biyar ciki har da likitoci hudu da ke aiki a wani gidan yari da ake tsare da 'yan kungiyar Taliban sun rasa rayukansu a Kabul, a lokacin da wani bam ya fashe a karkashin motarsu. Wannan dai shi ne hari na biyu mafi muni da aka kai cikin kwanaki biyun da suka gabata a babban birnin na Afghanistan, inda a ranar Lahadin da ta gabata, mutane 10 mutu yayin da kusan 50 suka jikkata a sakamakon fashewar wani bam da ke cikin wata mota.

A ‘yan watannin da suka gabata dai, babban birnin Afghanistan ya yi fama da rikice-rikice duk da tattaunawar zaman lafiya da ake yi tsakanin‘ yan Taliban da gwamnati tun watan Satumba a Doha. Sai dai Kungiyar IS ta dauki alhakin hare-hare da zubar da jini na watanni baya-bayannan a babban birnin kasar ta Afghanistan, ciki har da wadanda aka kai a jami'a da kuma wata cibiyar ilimi, wanda ya yi sanadin mutuwar kusan mutane 50.