Yunwar Holodomor ta cika shekaru 90 a Ukraine

A yayin da a Asabar din nan Ukraine ke bikin tunawa da ''yunwar Holodomor'' wacce ta halaka miliyoyin 'yan kasar a shekaru 90 da suka gabata, shugaban gwamnatin Jamus Olaf Scholz ya ce wajibi ne a dauki matakin hana yunwa zama wani makami a rikicin da Ukraine ke yi da Rasha. 

Scholz wanda ya halarci bikin na Holodomor a Ukraine tare da wasu shugabannin kasashen Kungiyar Tarayyar Turai, ya ce, duk da kulla yarjejeniyar fitar da hatsi daga Ukraine, Rasha na ci gaba da mayar da hannun agogo baya, inda take kai hare-hare kan kamfanonin da ke harkar noma. Ya ce wannan mataki da Rasha ke dauka ne ya haddasa karanci tare da tsadar kayan abinci a duniya.