Mutane da dama sun salwanta a Kwango

Akalla mutane 30 ne suka mutu yayin da wasu kimanin 200 kuwa suka bata a Jamhuriyar dimukuradiyyar Kwango, sakamakon nitsewar da wani jirgin ruwa ya yi. 

Lamarin ya faru ne a tafkin Mai-Ndombe da ke a yammacin kasar, a daren Asabar da ya gabata. 

Al'umar Kwangon dai sun fi amfani ne da sufurin ruwa, abin kuma da ya sanya yawaitar hadarin na ruwa a kasar.

Ana kuma danganta hakan da yawan daukar mutane da kayayyaki fiye da kima.

Kwararru sun ce daga cikin dalilan da ke sanya samun asarar rayuka a galibin haduran, sun hada ne da rashin amfani da rigunan kariya da kuma rashin kwarewa a harkar iyo.

Ko a watan jiya ma, an yi asarar rayukan mutum 167 a wasu haduran biyu dabam-dabam.