Michel Kafando ya sha ranstuwar kama aiki | Labarai | DW | 18.11.2014
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Labarai

Michel Kafando ya sha ranstuwar kama aiki

An rantsar da Michel Kafando a matsayin shugaban Burkina Faso na rikon kwarya bayan da aka zabe shi kan matsayin don maye gurbin Blaise Compaore da ya yi murabus.

Shugaban Burkina Faso na rikon kwarya Michel Kafando ya ce gwamnatinsa za ta mutunta tsarin dimokradiya a kasar kana za ta yi bakin iyawarta wajen ganin lamura sun daidaita.

A wani jawabi da ya yi bayan da ya sha rantsuwar kama aiki dazu, Mr. Kafando ya ce yanzu haka idanun al'ummar kasar a bude suke don haka ba zai yiwu a cigaba da tafiya a irin doron da ake yi a baya ba.

A jiya Litinin ce aka dai aka zabi Kafando don jagorantar gwamnatin rikon kwarya bayan da tsohon shugaban kasar Blaise Compaore ya yi murabus sakamakon matsin lamba da zanga-zanga da jama'ar kasar suka rika yi.

A gobe Laraba ce dai ake sa ran shugaban zai nada firaminista wanda za su hada gwiwa da shi wajen zaben mutane 25 da za su yi aiki da su a majalisar ministocin kasar.