Kotu ta daure tsohon minista a Zimbabuwe

Wata kotu a Zimbabuwe ta yanke wa tsohon ministan makamashin kasar hukuncin zaman shekaru hudu a kurkuku, bayan da ta sameshi da hannu a badakalar cin hanci a tsohuwar gwamnatin shugaba Robert Mugabe.

A yanzu tsohon ministan Samuel Undenge mai shekaru 62 da haihuwa zai shafe shekaru biyu da rabi a daure, bayan da ya yi shekara guda da rabi a kan zargi ba da kwangilar makudan kudade ta bayan fage.

Wannan dai shi ne karon farko da aka cimma nasarar daure wani daga cikin jiga-jigan jami'an tsohon shugaban kasar Mugabe. Gwamnatin shugaba Emmerson Mnangagwa ta yi aniyar sa kafar wando guda da ayyukan cin hanci da rasha, sai dai 'yan adawa na sukar tafiyar hawainiya a cika alkawarin yaki da cin hancin.