Afirka a Jaridun Jamus: AFCON da corona

A sharhin da ta rubuta kan kasar Mali, jaridar Süddeutsche Zeitung ta ce yanzu mako guda kenan gwamnatin Mali ta hana wani jirgin saman sojojin Jamus tashi daga Bamako. Hana jiragen sama zirga-zirgar ya shafi ayyukan dakarun Majalisar Dinkin Duniya a kasar ta Mali, musamman sojojin Jamus da lamarin ya shafa a baya-bayan nan. Ma'aikatar tsaron Jamus ta ce ba a taba samun irin wannan takaddama ba. Gwamnatin Mali dai ta ce gaza yin sahihiyar rijista da ya kamata sojojin Jamus din su yi ne, ya janyo samun tsaikon. Jamus dai na da dakaru kimanin dubu daya da 300 a kasar Mali, wadanda ke aiki karkashin kungiyar Tarayyar Turai EU da kuma Majalisar Dinkin Duniya.

A nata sharhin jaridar Frankfurter Allgemeine Zeitung, ta ce Afirka ba ta bukatar sayo alluran riga-kafi da ga wata nahiya. Jaridar ta ce wani kamfanin kasar Amirka ya zuba jari na makudan kudi a kasar Afirka ta Kudu, domin sarrafa magunguna. Wani kwararren likita kana shahararren dan kasuwa Patrick Soon-Shiong dan kasar Afirka ta Kudu da Amirka ke shirin kafa kamfanin da zai sarrafa daukacin alluran riga-kafin da ake bukata a Afirkan.

Ita kuwa jaridar Neue Zürcher Zeitung ta rubuta nata sharhin ne kan gasar cin kofin kwallon kafa ta nahiyar Afirka AFCON da ke gudana a yanzu haka a Kamaru. Jaridar ta ce shugaban da ya dade kan mulki Paul Biya na fatan samun kyakkyawan suna sanadiyyar gasar da ake fafatawa a yanzu haka a kasarsa. Shugaban mai shekaru 88 da duniya, kasarsar mai masaukin baki Kamaru ta lashe Burkina Faso da ci biyu da daya. Wannan ya yi wa shugaban dadi, domin kusan abin da ya mamaye gwamnatinsa cikin makwannin nan, shi ne batun wasanni da yanzu haka kasarsa ke karbar bakwanci.