HdM: Matashi mai zanen barkwanci a Kaduna | Himma dai Matasa | DW | 02.07.2020
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Himma dai Matasa

HdM: Matashi mai zanen barkwanci a Kaduna

Matashin dai na yin zane-zanen ban dariya da kuma bayar da gudunmawarsa a mujallu da jaridu da sauran kafafen sadarwa, a kokarinsa na inganta aikin jarida ta hanyar hotuna da zane-zane da ke kunshe da wasu bayanai.

Cartoonist Mustapha Bulama (DW/I. Yakubu)

Mustapha Bulama mai zanen barkwanci a Kadunan Najeriya

Sunan wannan matashin mai sana'ar zanen barkwanci Mustapha Bulama kuma tun bayan da ya kammala karatunsa ya kama sana'ar ta zane-zanen barkwanci, inda ya fara da wata kafar yada labarai mai suna Desert Herald a Kaduna, domin bayar da tasa gudunmawar wajan habaka bangaren ilmantarwa ta hanyar zane-zane masu sanya mutane annashuwa da  kuma bayar da takaitattun bayanai. Ya ce zanen barkwanci abu ne da ya koya tun yana karamin yaro, wanda kuma ke taimakawa ta hanyioyi da dama da ke taimakawa wajan sadarwa ta hanyar zane da sauran rubuce- rubuce masu kai sakwanni ga dinbim masu karanta jarida a kullum.

Karikatur HdM: Kaduna (Mustapha Bulama)

Zanen da Bulama yai wa jaridar Daily Trust a Najeriya

Da wannan sana'ar dai yake rufawa kansa asiri, kuma makudan kudi yake samu ta wannan harkar. Bulama ya kasance daya daga cikin manyan masu zanen barkwanci daga yankin arewacin Niajeriya da ke taka muhimmiyar rawa wajan fargar da al'umma ta hanyar aika takaitattun sakwanni ga masu karanta majallu da jaridu da sauran kasidu da zummar fargar da al'umma. Daga cikin nasarorin da ya samu sun hada da karuwar yawan mutane da yake bai wa horo da kuma yadda duk wanda ya ga zanensa zai yi dariya kuma zai ji hankalinsa ya kwanta. Daga cikin kalubalen da yake fuskanta sun hada da karancin masu wannan fasahar a cikin al'umma da kuma ta rashin kayan aiki da karancin shigowar hukumomi. Burin wannan matashi dai shi ne kara bullo da hanyoyin horar da matasa wannan sana'ar domin masu zane-zane da ke shiga harkar jarida da kuma aikewa da sakonni ta hanyar zanen cikin sauki.

Sauti da bidiyo akan labarin