Boren adawa da matakan tsimi a Sudan | Siyasa | DW | 27.09.2013
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

Siyasa

Boren adawa da matakan tsimi a Sudan

Tun wasu kwanaki kenan dubban 'yan Sudan a fadin kasar ke zanga-zangar nuna adawa da matakan tsimin kudi da gwamnatin shugaba Omar al-Bashir ke aiwatarwa.

Tashoshin telebijin na kasashen Larabawa sun ce muatne kimanin 30 aka kashe, amma masu fafatuka na ikirarin cewa a Khartoum kadai, mutane 100 aka kashe.

Bakin hayaki ya tirnike sararin samaniyar Khartoum babban birnin kasar Sudan, wuta na ci a gidajen mai sannan masu zanga-zanga na yi ta kona tayoyin mota don nesanta kansu daga dakarun tsaro. 'Yan adawa da shugaban Sudan Omar al-Bashir suna wannan bore na gama gari don adawa da matakin tsimi da shugaban ya sanar a ranar Lahadi da ta gabata.

"Abubuwa uku suka jawo matsalolin tattalin arzikinmu. Na farko sh ne kayan da muke shigowa da su sun fi wanda muke fitarwa yawa, muna amfani da kayan da ya fi wanda muke samarwa, sannan ma'aikatar kudi na kashe kudi fiye da wanda take samu. Da yawa na cewa janye tallafin man fetir zai fi shafar talakawa. Amma ka da sun manta cewa ci gaban matsalar tattalin arziki zai kara wa talaka wani nauyi."

GettyImages181646045 Sudanese President Omar al-Bashir speaks during a press conference in Khartoum late on September 22, 2013. The United States was stuck on the horns of a dilemma, mulling whether to grant a visa to the Sudanese president, an indicted war crimes suspect, amid growing pressure to bar him from a UN summit. Bashir's request for a visa to travel to New York for next week's UN General Assembly has embarrassed the US government and the United Nations. AFP PHOTO / ASHRAF SHAZLY (Photo credit should read ASHRAF SHAZLY/AFP/Getty Images)

Shugaban Sudan Omar al-Bashir

Adawa da matakin tsuke bakin aljihu

Sai dai matakin tsimin bai samu karbuwa ba domin tun wasu kwanaki da suka gabata dubban 'yan kasar ke yi ta zanga-zanga adawa da matakin ninka farashin man fetir har sau biyu da tsadar sufuri abin da ya yi tasiri ga farashin kayan abinci. Kungiyoyin adawa na zargin cewa shugaba al-Bashir na bukatar karin kudi domin yakar 'yan adawa kamar yadda Amgad Farid mai fafatukar girke mulkin demokradiyya ya nunar.

"Dukkan al'ummar Sudan ta ki wannan mataki na danniya. Gwamnati na kashe kudi domin muzguna wa 'yan adawa da kuma sayen makaman yakin da take yi. Mai ya sa ba za ta iya samar wa al'ummarta abinci da kuma man fetir ba?

Shi kuwa Bashir Adam Rahma na jam'iyyar adawa ta Popular Congress cewa ya yi.

"Gwamnati na fama da matsaloli domin kasafin kudinta ya rushe. Saboda haka take neman kudi da za ta kashe wa gwamnati da kuma jam'iyyar Congress ta shugaba Bashir. Tana bukatar karin kudi ga yakin da take yi a lardin Darfur da Kordofan ta Kudu da kuma yankin Blue Nile."

Barazana ga gwamnatin al-Bashir

Cars burn in front of a building during protests over fuel subsidy cuts in Khartoum September 25, 2013. At least 27 people have been killed in protests in Khartoum over fuel subsidy cuts, a medical source said on Thursday as another bout of the worst unrest seen in Sudan's relatively well-off central regions for years broke out in its biggest port. Thousands had marched in Khartoum on Wednesday, torching cars, buildings and petrol stations. Picture taken September 25, 2013. REUTERS/Stringer (SUDAN - Tags: CIVIL UNREST POLITICS BUSINESS ENERGY)

An yi ta kone-kone a lokacin boren

Shin kowace irin bazarana wannan bore ke da ita ga karfin ikon shugaba al-Bashir. Florian Dähne shi ne wakilin gidauniyar Jamus ta Friedrich Ebert dake birnin Khartoum ya ce ko shakka babu boren wata bazarana ce ga gwamnatin Sudan.

"Ko da yake kawo yanzu zanga-zangar ba ta kai karfin da za ta kai ga kifar da gwamanti nan gaba kadan ba, amma wata damuwa ce ga gwamnati dake fama da matsalolin tattalin arziki da na siyasa wanda zai iya ta'azzara sakamakon wannan bore."

Tun dai fara boren a farkon wannan mako mutane da yawa sun rasa rayukansu. Sai dai masu fafatuka na kara kira ga jama'a su ba su goyon baya a kokarinsu na neman 'yancin walwala, zaman lafiya da kuma adalci a kasar ta Sudan.

Mawallafa: Hans-Michael Ehl / Mohammad Nasiru Awal
Edita: Saleh Umar Saleh

Sauti da bidiyo akan labarin