An nemi Kenya ta sake tunani kan Dadaab

Hukumar ta ce idan har aka kai ga rufe sansanin, hakan na iya jawo kalubale babba ga kasar ta Somaliya wadda dama ke fama da tada kayar baya ta 'yan bindiga kazalika mazauna sansanin da Kenya din ke son su koma gida ka iya shiga wani yanayi maras kyau.

Mai magana da yawun hukumar ya ce za su yi bakin kokarinsu wajen ganin an tabbatar da doka da oda a Dadaab wanda hakan zai hana masu son tada zaune tsaye aiwatar da hare-hare a cikin kasar ta Kenya.

A ranar Asabar din da ta gabata ce mahukuntan Kenya din suka baiwa hukumar kula da 'yan gudun hijira ta Majalisar Dinkin Duniya wa'adin watanni uku na su rufe sansanin, abinda da dama ke kallo a matsayin martani kan harin jami'ar nan ta garin Garissa da 'yan al-Shabaab suka kai har ma suka hallaka dalibai kusan 150.