یورپی یونین کی طلبہ تبادلہ اسکیم: برطانیہ پھر حصہ بن جائے گا

برطانوی دارالحکوت لندن سے بدھ 17 دسمبر کو موصولہ رپورٹوں کے مطابق برطانیہ کے یورپی یونین کے ساتھ روابط کے نگران وزیر نک ٹامس سائمنڈز نے کہا کہ وزیر اعظم کیئر اسٹ‍ارمر کی حکومت کا یہ فیصلہ ''برطانوی نوجوانوں کے لیے بہت بڑی فتح‘‘ ہے، جس کے بعد وہ جنوری 2027ء سے یورپی یونین کے 27 رکن ممالک میں پھر سے تعلیم اور پیشہ وارانہ تربیت حاصل کر سکیں گے۔

یورپی یونین میں برٹش شہریوں کے اوور اسٹے کے خلاف خودکار نظام

برطانیہ ماضی میں عشروں تک یورپی یونین کا حصہ رہا تھا مگر پھر قریب ایک دہائی قبل کرائے گئے ایک عوامی ریفرنڈم کے بعد لندن حکومت نے برطانیہ کے اس بلاک سے اخراج کا فیصلہ کیا تھا، جسے عرف عام میں 'برٹش ایگزٹ‘ یا مختصراﹰ 'بریگزٹ‘ کہا جاتا ہے۔

بریگزٹ کے عمل کے دوران لندن اور برسلز میں یورپی یونین کی قیادت کے مابین کئی معاہدے طے پائے تھے، جن میں یہ طے کیا گیا تھا کہ یونین سے برطانیہ کے اخراج کے بعد دونوں کے مستقبل کے تعلقات کن کن شعبوں میں کس کس نوعیت کے ہوں گے۔

برسلز اور لندن کے مابین پوسٹ بریگزٹ ڈیل

لندن میں وزیر اعظم کیئر اسٹارمر کی حکومت کے اقتدار میں آنے کے بعد اسی سال مئی میں لندن اور برسلز کے مابین ایک ایسا نیا لیکن بہت تفصیلی معاہدہ بھی طے پا گیا تھا، جس میں پہلے سے طے شدہ معاہدوں میں جامع نوعیت کی متعدد ترامیم کی گئی تھیں۔

اس دوطرفہ معاہدے کو ''پوسٹ بریگزٹ ری سیٹ ڈیل‘‘ کا نام دیا گیا تھا۔

ماضی میں لندن میں جب وزیر اعظم بورس جانسن کی حکومت تھی، تو برطانیہ یورپی یونین کی اسٹوڈنٹس ایکسچینج اسکیم ایراسمس سے یہ کہہ کر نکل گیا تھا کہ تب برٹش گورنمنٹ اس اسکیم پر جتنی رقوم خرچ کر رہی تھی، ان سے حاصل ہونے والے فوائد ان رقوم سے متناسب نہیں تھے۔

اب لیکن اسٹارمر حکومت نے مئی میں طے پانے والے یورپی برطانوی معاہدوں کے تناظر میں لندن کی یورپی ایراسمس اسکیم میں دوبارہ شمولیت کا فیصلہ کیا ہے۔

یورپی یونین اور برطانیہ نوجوانوں کے لیے نئی ویزا اسکیم پر متفق

پہلے سال ایک لاکھ برطانوی نوجوانون‌ کو فائدہ ہو گا

برٹش کیبینٹ آفس کے مطابق لندن حکومت نے ایراسمس اسکیم میں دوبارہ شمولیت کا فیصلہ ان مالیاتی شرائط کے تعین کے بعد کیا ہے، جو یورپی یونین کے ساتھ مذاکرات میں طے کی گئیں۔ اب اس یورپی اسکیم میں لندن کی شمولیت پر اخراجات بھی ماضی کے مقابلے میں کم ہوں گے۔

طے یہ ہوا ہے کہ ایراسمس اسکیم میں دوبارہ شمولیت کے لیے برطانیہ 2027ء میں 570 ملین پاؤنڈ (668 ملین ڈالر) ادا کرے گا۔ اس کے بعد کے برسوں میں یورپی یونین کی اس اسکیم میں شمولیت کے باعث لندن کی طرف سے ادا کیے جانے والے اخراجات کا تعین یونین کے ساتھ مذاکرات میں مستقبل میں کیا جائے گا۔

برطانیہ اور یورپی یونین کا نیا فوڈ بارڈر کنٹرول

برطانوی وزیر نک ٹامس سائمنڈز کے مطابق ایراسمس اسکیم میں برطانیہ کی دوبارہ شمولیت کے بعد پہلے ہی سال ایک لاکھ سے زائد برٹش اسٹوڈنٹس یورپی یونین میں تعلیم و تربیت کی سہولیات سے فائدہ اٹھا سکیں گے۔

برطانیہ میں یورپی یونین کے ساتھ اس تعلیمی تبادلہ پروگرام پر عمل درآمد کے لیے آئندہ ایک نیا قومی ادارہ بھی قائم کیا جائے گا۔

ادارت: کشور مصطفیٰ