یورپی خواتین دائیں بازو کی طرف مردوں کی نسبت زيادہ مائل

جرمن شہر کیمنٹز میں حال ہی میں مہاجرین اور غیر ملکیوں کے خلاف ہزاروں کی تعداد میں دائیں بازو کی سوچ کے حامل افراد نے مظاہرے کیے۔ ان میں زیادہ تر تو مرد حضرات ہی تھے لیکن خواتین کی شمولیت بھی دیکھنے میں آئی۔

جرمنی میں یہ ایک عمومی خیال ہے کہ اسلام مخالف تحريک پیگیڈا اور مہاجرین و اسلام مخالف سیاسی جماعت اے ايف ڈی کے ارکان کو ہمیشہ ناراض یورپی مردوں سے ہی جوڑا جاتا ہے۔ لیکن جرمنی کی سوشل ڈیموکریٹک جماعت سے منسلک فریڈرش ایبرٹ فاؤنڈیشن کی ایک تحقیقاتی رپورٹ کی رُو سے یہ بات درست نہیں۔

اس رپورٹ میں فرانس، ہنگری، جرمنی، یونان، پولینڈ اور سویڈن میں پاپولسٹ ووٹروں کا جائزہ لیا گیا ہے جس سے پتہ چلا ہے کہ خواتین کا رجحان رائٹ ونگ کی جانب تیزی سے بڑھ رہا ہے۔

دائیں بازو کی جماعتیں خواتین میں مقبولیت کیوں حاصل کر رہی ہیں؟

یورپی رائٹ ونگ جماعتیں نسائیت کی پرانی تصویر پیش کرتی ہیں۔ اس کے باوجود سن 2017 کے جرمن پارلیمانی انتخابات میں مشرقی ریاستوں میں سترہ فیصد خواتین نے دائیں بازو کی جماعت اے ایف ڈی کو ووٹ دیا جبکہ اسی طرح مغربی حصے میں آٹھ فیصد خواتین اس مہاجرین مخالف جماعت کی ووٹر بنیں۔

کیا وجہ ہے کہ یہ جماعتیں خواتین میں مقبولیت حاصل کر رہی ہیں؟

ایف ای ایس کے جائزے کی تدوین کرنے والی ایلیزا گوٹشے کا کہنا ہے کہ اس پسندیدگی کا پس منظر ان جماعتوں کی جانب سے ملک میں سماجی بہبود کے نظام کو مستحکم کرنے کا وعدہ ہے۔ ایلیزا کے مطابق،’’ ان جماعتوں کا کہنا ہے کہ اقتدار میں آنے کی صورت میں وہ بچوں کی بہبود کی مد میں دی جانے والی رقوم میں اضافہ کریں گی اور خاندانوں کی بہتری کے لیے الاؤنس بھی دیے جائیں گے۔‘‘

اے ایف ڈی، جرمن حکومت کے مہاجرین کے لیے خیر مقدمانہ پالیسی کے مقابلے میں ’بچوں کو خوش آمدید‘ کہنے کی پالیسی کی حامی ہے۔ در حقیقت بیشتر خواتین نے اس خدشے کے تحت دائیں بازو کی جماعتوں کے ووٹ بینک میں اضافہ کیا ہے کہ اگر مستقبل میں جرمنی کا پينشن نظام منہدم ہو گیا تو کیا ہو گا۔

حیران کن طور پر اجانب دشمن نظریات

رپورٹ میں یہ بھی بتایا گیا ہے کہ یورپی خواتین مردوں کے مقابلے میں زیادہ اسلام اور مہاجرین مخالف عقائد کی حامل ہوتی ہیں۔ اس حوالے سے ایلیزا گوٹشے کا کہنا ہے،’’ میرے خیال میں خواتین کو یہ احساس ہوتا ہے کہ وہ معاشرے کا کمتر حصہ ہیں۔ اسی لیے انہیں مہاجرین اور تارکین وطن کے خلاف مقابلہ کرنا پڑتا ہے۔‘‘

ص ح / ع س /  نیوز ایجنسی