یورپ آنے والے تارکین وطن ’پھٹے پائپ سے ابلنے والا پانی‘

پیرس سے موصولہ نیوز ایجنسی اے ایف پی کی رپورٹوں کے مطابق قدامت پسند نکولا سارکوزی نے گزشتہ برسوں کے دوران بہت بڑی تعداد میں یورپ کا رخ کرنے والے تارکین وطن کا موازنہ ایسے پانی سے کیا تھا جو کسی گھر میں پھٹے ہوئے پائپ سے تیز دھار کی صورت میں نکل کر پھیلتا جا رہا ہو۔

سارکوزی نے، جو اس وقت فرانس کی ریپبلکن اپوزیشن کے سربراہ ہیں، یہ بات ملکی دارالحکومت پیرس کے نواح میں ایک عوامی جلسے سے خطاب کرتے ہوئے جمعے کے روز کہی تھی اور اس بات پر انہیں اپنے وطن فرانس کے علاوہ اٹلی تک میں شدید تنقید کا سامنا ہے۔

سارکوزی کے پس رو اور سوشلسٹ پارٹی سے تعلق رکھنے والے فرانس کے موجودہ صدر فرانسوا اولانڈ نے کہا ہے کہ سیاستدانوں کو عوامی سطح پر بحث میں احتیاط پسندی سے کام لیتے ہوئے سخت نوعیت کے بیانات سے اجتناب کرنا چاہیے۔ سارکوزی کے اسی بیان کے بارے میں موجودہ فرانسیسی وزیر اعظم مانوئل والس نے کہا ہے کہ کسی ’سیاستدان کی سیاسی زندگی دھبہ بن جانے والے ایسے الفاظ اور موازنوں سے بہتر طرز اظہار کی متقاضی‘ ہوتی ہے۔

نکولا سارکوزی نے پیرس کے نواح میں ایک جلسے میں یورپی کمیشن کے ان ارادوں کی مخالفت کی تھی، جن کے تحت کمیشن نے بحیرہ روم کے راستے اٹلی، یونان اور مالٹا پہنچنے والے پناہ کے متلاشی ہزارہا غیر قانونی تارکین کو یونین کے رکن مختلف ملکوں میں تقسیم کرنے کی تجویز پیش کی ہے۔ سینکڑوں کی تعداد میں ٹوٹی پھوٹی اور غیر محفوظ کشتیوں پر سوار یورپ کی طرف غیر قانونی سفر کرنے والے ایسے تارکین وطن کا تعلق اکثر شمالی افریقہ یا مشرق وسطیٰ کے ممالک سے ہوتا ہے۔

پناہ کے متلاشی ایسے ہزارہا مہاجرین کی مختلف رکن ملکوں میں تقسیم کے یورپی یونین کے منصوبے پر تنقید کرتے ہوئے سارکوزی نے اپنی سوچ کے اظہار کے لیے یہ استعارہ استعمال کیا تھا کہ مسئلہ ’گھر کے اندر پھٹ جانے والے پانی کے پائپ‘ کا ہے۔

دائیں بازو کے اس فرانسیسی سیاستدان نے کہا تھا، ’’گھر کے باورچی خانے میں پانی کا پائپ پھٹ جاتا ہے۔ مرمت کے لیے کاریگر آتا ہے اور کہتا ہے کہ اس کے پاس مسئلے کا حل موجود ہے۔ ہم آدھا پانی باورچی خانے میں ہی رہنے دیں گے اور ایک چوتھائی ڈرائنگ روم میں جبکہ آخری چوتھا حصہ والدین کی خوابگاہ میں چھوڑ دیں گے۔ اگر مسئلہ پھر بھی حل نہ ہوا تو جو پانی باقی بچے گا، اسے بچوں کے کمرے میں چھوڑ دیں گے۔‘‘

نکولا سارکوزی کا یہ متنازعہ موقف بلا تاخیر کس تنقیدی ردعمل کی وجہ بنا، اس کا اندازہ اس بات سے بھی لگایا جا سکتا ہے کہ فرانس میں حکمران سوشلسٹ پارٹی نے کہا ہے، ’’سارکوزی نے خود جو کچھ کہا ہے، وہ (پھٹے پائپ سے نکلنے والا) ایسا پانی ہے جو فرانسیسی جمہوریہ تک پہنچنے لگا ہے۔‘‘

اسی دوران اٹلی کے یورپی یونین سے متعلقہ امور کے وزیر ساندروگوزی نے بھی سابق فرانسیسی صدر پر تنقید کرتے ہوئے کہا ہے کہ جو کچھ سارکوزی نے کہا ہے، وہ قابل افسوس ہے۔ ساندرو گوزی کے مطابق، ’’یہ بیان اس وقت اور بھی قابل افسوس محسوس ہوتا ہے، جب آپ اس المیے کے بارے میں سوچتے ہیں کہ یورپ پہنچنے کی کوشش میں بحیرہ روم کے پانیوں میں ایسے ہزاروں تارکین وطن ڈوب چکے ہیں۔‘‘