ہنگری: مہاجرین مخالف پالیسی کا دفاع موبائل بِل بورڈ کریں گے

اس ماہ کے اوائل میں یورپی پارلیمان کے رکن گائے فرہوفٹ شٹڈ نے برسلز میں ایک ٹرک پر ایک بل بورڈ آویزاں کیا تھا جس میں ہنگری کے وزیر اعظم وکٹر اوربان کو ایک ایسے فرد کے طور پر ظاہر کیا گیا تھا جو بلاک سے کافی رقوم لینے کے بعد یورپی یونین کو تباہ کرنے پر تلے ہوئے ہیں۔

اس کے رد عمل کے طور پر بوڈا پیسٹ حکومت کے ترجمان زولتان کوسک کا گزشتہ رات ایک بیان میں کہنا تھا کہ ایک ایسا ہی ٹرک ایسے بِل بورڈز کے ساتھ ہنگری بھر میں پھرانے کے بعد بودا پیسٹ بھیجا جائے گا جو فرہوفٹ شٹڈ کے نظریات کا مضحکہ اڑائیں گے۔

اس بل بورڈ پر درج ہو گا،’’ کہ سن دو ہزار پندرہ سے اب تک سینکڑوں افراد دہشت گردانہ حملوں میں مارے گئے اور یہ کہتے ہیں کہ مہاجرت کا بحران نہیں۔‘‘

اپریل میں تیسری مدت کے لیے وزیر اعظم کا منصب سنبھالنے والے وکٹر اوربان یورپی یونین کی جانب سے مہاجرین کے بحران سے نمٹنے کے لیے ایک متفقہ حکمتِ عملی اپنانے کی راہ میں رکاوٹ سمجھے جاتے ہیں۔ وہ یورپی یونین کے رکن ممالک میں کوٹے کے تحت  مہاجرین کی تقسیم کے بھی سخت مخالف ہیں۔

ابھی دو روز قبل ہی برسلز میں بریگزٹ کانفرنس کے حاشیے پر بات چیت کرتے ہوئے اوربان نے بریگزٹ کا ذمہ دار جزوی طور پر یورپی کمیشن کے صدر ژاں کلود ینکر اور یورپ آنے والے مہاجرین دونوں قرار دیا تھا۔

حال ہی میں ہنگری نے اقوام متحدہ کے منظم مہاجرت کے حوالے سے مجوزہ عالمی معاہدے سے دستبرداری کا اعلان بھی کیا ہے۔

ص ح / ع ت / نیوز ایجنسی