کورونا کے خلاف ویکسین نہیں گولیاں، دوڑ میں کئی ممالک شامل

کورونا وائرس کی وجہ سے لگنے والے بیماری کووڈ انیس کے خلاف طبی تحفظ کے لیے اب تک ویکسین کے متبادل کے طور پر گولیوں کے استعمال کی اجازت دینے والے ممالک کا تعلق زیادہ تر مغربی دنیا سے ہے۔

امریکا میں ان گولیوں کے استعمال کی اجازت خوراک اور ادویات کے نگران ملکی محکمے ایف ڈی اے نے دی۔ اس محکمے کے مطابق یہ گولیاں صرف ایسے مریض استعمال کر سکتے ہیں، جنہیں شدید نوعیت کے طبی خطرات لاحق ہوں۔ یہ اجازت 23 دسمبر کو امریکی دوا ساز ادارے مَیرک کی تیار کردہ گولیوں کے لیے دی گئی۔

اس سے پہلے اسی ادارے نے ملکی فارما کمپنی فائزر کی تیار کردہ اور مبینہ طور پر زیادہ مؤثر دوائی کے استعمال کی اجازت بھی دے دی تھی۔ فائزر کی تیار کردہ گولی کا نام 'پاکسلووِڈ‘ ہے اور اس وقت بہت سے ممالک اس کی وسیع پیمانے ہر خریداری کی کوشش میں ہیں۔

مَیرک کی تیار کردہ گولی کا نام ’مولنوپیراویر‘ ہے، جس کے تجرباتی استعمال کے نتائج اور مجموعی ڈیٹا بہت متاثر کن نہیں رہے تھے۔ اس کے علاوہ فرانس نے پہلے اس دوائی کی خریداری کا آرڈر دیا مگر پھر اسے منسوخ کر دیا۔ یہ بات بھی ان گولیوں کی ساکھ کو کسی حد تک نقصان پہنچانے کی وجہ بنی۔

اس کے برعکس برطانیہ نے 31 دسمبر کو فائزر کی تیار کردہ دوائی کو معمولی انفیکشن والے مریضوں کے لیے مؤثر قرار دیتے ہوئے اپنے ہاں اس کے استعمال کی اجازت دے دی تھی۔ اس کے تقریباﹰ فوری بعد جنوبی کوریا نے بھی ہنگامی بنیادوں پر فیصلہ کرتے ہوئے کہہ دیا تھا کہ فائزر کی یہی دوائی وہاں بھی استعمال کی جا سکتی ہے۔

اسرائیل مَیرک کی بنائی ہوئی اینٹی کورونا ٹیبلٹ کے عوامی استعمال کی منظوری دینے والا تازہ ترین ملک ہے۔ اس سے پہلے جاپان، بھارت، ڈنمارک، برطانیہ اور فلپائن کی حکومتیں بھی اپنے ہاں ’مولنوپیراویر‘کے استعمال کی منظوری دے چکی ہیں۔

یورپی یونین میں ابھی تک ان دونوں طرح کی ادویات کے عمومی استعمال کی اجازت نہیں دی گئی کیونکہ یورپی میڈیسن ایجنسی ابھی تک اس بارے میں غور و فکر کر رہی ہے۔ تاہم اس یورپی ریگولیٹری اتھارٹی کا کہنا ہے کہ پورے بلاک میں عام اجازت سے قبل ان دونوں ادویات کو بالغ یورپی مریض ابھی سے استعمال کر سکتے ہیں۔

مَیرک اور فائزر کی تیار کردہ گولیوں کی خریداری کے اب تک سب سے زیادہ آرڈر دینے والے تین گاہک امریکا، کینیڈا اور یورپی یونین ہیں۔

ر ب/ م م (روئٹرز)