کوارٹر فائنل کی دوڑ: اٹلی‘ فرانس یا رومانیہ؟

گروپ اے میں چیک جمہوریہ کی ٹیم کے خلاف ترکی کی حیران کن فتح نے کوارٹر فائنل میں اس ٹیم کی جگہ پکی کرلی جبکہ منگل کے روز گروپ بی میں جرمنی نے آسٹریا کو ایک۔صفر سے شکست دے کر کوارٹر فائنل تک رسائی حاصل کرلی۔

آج گروپ سی میں اٹلی اور فرانس کا میچ انتہائی اہمیت کا حامل ہے۔ گروپ سی میں آج ہی ہالینڈ کا مقابلہ رومانیہ سے ہورہا ہے۔ اٹلی‘ فرانس اور رومانیہ میں سے کوئی ایک ٹیم کوارٹر فائنل تک رسائی حاصل کرسکتی ہے۔ اس گروپ سے ہالینڈ نے کوارٹر فائنل مرحلے میں پہلے ہی اپنی جگہ بنالی ہے۔

اگر رومانیہ کی ٹیم ہالینڈ کو شکست دینے میں کامیاب ہوجاتی ہے تو اس صورت میں اٹلی اور فرانس‘ دونوں ہی ٹیمیں یورو کپ دو ہزار آٹھ سے باہر ہوجائینگی۔

گروپ سی میں رومانیہ نے اٹلی اور فرانس کے ساتھ اپنے میچ برابری پر ختم کئے ہیں جبکہ اسی گروپ میں ہالینڈ نے اٹلی اور فرانس جیسی دو مضبوط ٹیموں کو آسانی سے شکست دی ہے۔

آج کے میچوں کے نتائج سامنے آنے کے بعد گروپ سی کی صورتحال پوری طرح سے واضح ہوجائیگی جبکہ گروپ ڈی میں سویڈن اور روس میں سے ایک ٹیم کوارٹر فائنل تک پہنچ سکتی ہے۔ اس گروپ سے سپین کی ٹیم کوارٹر فائنل تک رسائی حاصل کرچکی ہے۔