کاتالونیا: پہلی اکتوبر کا متنازعہ ریفرنڈم
اسپین کے علاقے کاتالونیا میں مقامی حکومت کی نگرانی میں آزادی کے ریفرنڈم کا انعقاد ہو رہا ہے۔ میڈرڈ میں قائم مرکزی حکومت اس ریفرنڈم کو کالعدم قرار دے چکی ہے۔
ریفرنڈم کی مہم
جمعہ انتیس سمبر کو کاتالونیا میں ریفرنڈم کے انعقاد کے لیے جاری انتخابی مہم ختم ہو گئی۔ اس موقع پر بارسلونا میں کاتالونیا کے علیحدگی پسندوں نے ایک بڑی ریلی کا انتظام کیا۔ ایک دیوار پر کھڑا نوجوان کاتالونیا کا جھنڈا اٹھائے ہوئے ہے۔
کاتالونیا کے فائرفائٹرز بھی فعال
ہسپانوی علاقے کاتالونیا میں آزادی کے حامی بے شمار افراد نے درجنوں اسکولوں کو اپنے قبضے میں لے لیا ہے۔ ان اسکولوں کو مجوزہ ریفرنڈم کے دوران بطور پولنگ اسٹیشنوں کے استعمال کیا جانا ہے۔ بارسلونا کے فائر فائٹرز نے بھی پولنگ اسٹیشنوں کی حفاظت کا اعلان کیا ہے۔ اتوار پہلی اکتوبر کے متنازعہ آزادی ریفرنڈم کے انعقاد کو ممکن بنانے کے لیے کاتالونیا کے علیحدگی پسند پوری طرح سرگرم ہیں۔
پولنگ اسٹیشنوں پر لوگ قابض
کئی اسکولوں میں قائم کیے گئے پولنگ اسٹیشنوں میں ووٹ ڈالنے کے دن سے پہلے ہی لوگ ڈیرے ڈالے ہوئے ہیں۔ مرکزی حکومت نے ووٹ ڈالنے پر پابندی عائد کر رکھی ہے۔
کاتالونیا کے صدر پوج ڈیمونٹ
کاتنالونیا کے صدر کارلیس پوج ڈیمونٹ نے ریفرنڈم کے کامیاب انعقاد کے لیے مختلف انتخابی ریلیوں سے خطاب کیا۔ انہوں نے جمعہ انتیس ستمبر کو بارسلونا میں آخری ریلی سے خطاب کیا۔ میڈرڈ حکومت نے ریفرنڈم کے حق چلائی گئی اُن کی انتخابی مہم پر ناراضی کا اظہار کیا ہے۔
کارلیس بمقابلہ ماریانو
کاتالونیا کے ریفرنڈم کے انعقاد کے لیے مقامی حکومت کے صدر کارلیس پوج ڈیمونٹ سرگرم ہیں تو مرکزی حکومت کے وزیراعظم ماریانو راخوئے اس ریفرنڈم کو کالعدم قرار دینے کے علاوہ سخت سکیورٹی انتظامات کے حامی ہیں۔ ان دونوں لیڈروں کے خصوصی کارٹونوں کو بھی پسند کیا گیا ہے۔
کاتالونیا کی آزادی کا خواب
کاتالونیا کی صوبائی حکومت کے سربراہ کارلیس پُوج ڈیمونٹ نے جمعہ انتیس ستمبر کو ایک بڑے عوامی اجتماع سے جذباتی انداز میں خطاب کیا۔ اس موقع پر انہوں نے کہا کہ حالات انتہائی تناؤ کا شکار ہو چکے ہیں اور یہ حالات اُن کے اُس خواب کو حقیقت کا رنگ دینے والے ہیں، جو کبھی بعید از قیاس تھا۔ انتخابی ریلی کے بعد پوج ڈیمونٹ عام لوگوں سے ملتے ہوئے۔
پولنگ سامان کی ترسیل
کاتالونیا کے کالعدم ریفرنڈم کے انعقاد کے لیے پولنگ اسٹیشنوں تک ووٹ ڈالنے کی پرچیوں اور دوسرے سامان کی ترسیل کے لیے آزادی کے حامی عوام خاصے سرگرم ہیں۔ ایک پولنگ بوتھ پر ووٹنگ کا سامان پہچانے کے لیے عام لوگ قطار میں کھڑے ہیں۔
متنازعہ ریفرنڈم اور کاتالونیا کے طلبا
بارسلونا یونیورسٹی کے علیحدگی پسند طلبا کے قائم کردہ اسٹال پر پولنگ کے حق میں بینر بھی لگے ہوئے ہیں۔ اس اسٹال پر لوگوں کو ووٹ ڈالنے کے بارے میں بنیادی معلومات فراہم کی جا رہی ہیں۔
اختتامی ریلی
پہلی اکتوبر کے ریفرنڈم کے انعقاد کی انتخابی مہم کے موقع پر بارسلونا شہر میں علیحدگی پسندوں کی بڑی ریلی کا انعقاد کیا گیا۔ اس ریلی میں سینکڑوں لوگوں شریک تھے۔ ریلی کے دوران کاتالونیا کا ایک ستارے والا جھنڈا ہر طرف لہرا رہا تھا۔
متنازعہ ریفرنڈم کے پوسٹرز
کاتالونیا کے ریفرنڈم کو میڈرڈ حکومت نے کالعدم قرار دے رکھا ہے لیکن اس کے باوجود مرکزی شہر بارسلونا میں جگہ جگہ ریفرنڈم کے حق میں علیحدگی پسندوں نے پوسٹرز چسپاں کر رکھے ہیں۔
آمر فرانکو اور راخوئے
کاتالونیا کے متنازعہ ریفرنڈم کے لیے نکالی جانے والی ریلیوں میں مرکزی حکومت کے وزیراعظم ماریانو راخوئے کے اقدامات کو تنقید کا نشانہ بنایا گیا۔ ایک ریلی میں ایک خاتون ہسپانوی ڈکٹیٹر فرانسسکو فرانکو اور ماریانو راخوئے کا پوسٹر تھامے ہوئے ہے۔