چین میں سنسرشپ: مظاہرین کا جریدے کے دفتر کے سامنے احتجاج

چینی شہر گوآنگ ژُو سے ملنے والی خبر ایجنسی روئٹرز کی رپورٹوں کے مطابق ان مظاہرین نے مطالبہ کیا کہ صوبائی سطح پر کام کرنے والے کمیونسٹ پارٹی اہلکار اور پروپیگنڈا چیف کو مستعفی ہو جانا چاہیے۔ جنوبی چین کے صوبے گوآنگ ڈونگ کے دارالحکومت گوآنگ ژُو میں اس احتجاج کی وجہ وہ مسلسل بڑھتا ہوا اختلاف رائے بنا جو وہاں آزادی صحافت کے حوالے سے صوبائی حکومت اور عوام میں پایا جاتا ہے۔ روئٹرز نے اس صورت حال کو چینی کمیونسٹ پارٹی کے سربراہ شی جِن پِنگ کے اصلاحات کے ارادوں اور وعدوں کے لیے ابتدائی امتحان کا نام بھی دیا ہے۔

چین کے اس صوبے میں سنسرشپ سے متعلق حکومتی فیصلوں اور عوامی عدم اطمینان کی وجہ سے پیدا ہونے والی بے چینی گزشتہ ہفتے دیکھنے میں آئی تھی۔ تب ایک بااثر ہفت روزہ جریدے Southern Weekly کے رپورٹروں نے سنسرشپ کے صوبائی محکمے پر الزام لگایا تھا کہ اس کے اہلکاروں نے اس جریدے میں اشاعت کے لیے تیار کردہ قارئین کے نام نئے سال کی مبارکباد کے ایک پیغام کو سرے سے بدل دیا تھا۔

اس جریدے نے اس کھلے خط میں اپنے قارئین سے مخاطب ہوتے ہوئے آئینی حکومت کی حمایت بھی کی تھی۔ لیکن سنسرشپ کے صوبائی محکمے کے اہلکاروں نے اسی جریدے میں اشاعت کے لیے جس خط کو زبردستی شامل کیا، وہ اس بارے میں تھا کہ چین میں کمیونسٹ پارٹی کتنے بڑے بڑے کارنامے انجام دے چکی ہے۔

اس مظاہرے کے سلسلے میں گوآنگ ڈونگ کی صوبائی حکومت اب تک کافی تحمل کا مظاہرہ کر رہی ہے اور کوئی ایسا قدم نہیں اٹھانا چاہتی، جو عوام میں پائے جانے والے غصے اور طیش میں اضافے کا سبب بنے۔ اسی لیے صوبائی حکام اور مقامی پولیس نے گوآنگ ژُو میں مظاہرین کو Southern Weekly چھاپنے والے ادارے Southern Group کے ہیڈ کوارٹرز کے سامنے جمع ہو کر احتجاج کرنے سے نہ روکا۔

صوبائی حکومت نے سنسرشپ کے خلاف اس احتجاج کو نہ روکنے کا فیصلہ اپنے نئے سربراہ ہُو چُن ہُوا کے حکم پر کیا۔ ہُو چُن ہُوا ابھی حال ہی میں گوآنگ ڈونگ میں صوبائی حکومت کے سربراہ بنائے گئے تھے۔ وہ چینی سیاست کی ایک ابھرتی ہوئی سٹار شخصیت سمجھے جاتے ہیں اور ریاستی سنسرشپ کے خلاف عوامی عدم اطمینان کے تدارک کے سلسلے میں محتاط ردعمل کے قائل ہیں۔

پیر کے روز کیے گئے اس مظاہرے کے دوران شرکاء نے ’سدرن ویکلی‘ کے صدر دفاتر کے سامنے زمین پر ہاتھوں سے لکھے گئے ایسے چھوٹے چھوٹے سائن بورڈ بھی بچھا دیے جن پر تحریر تھا، ’آزادیء اظہار جرم نہیں ہے‘ اور ’چینی عوام آزادی چاہتے ہیں‘۔

اس مظاہرے کے دوران شرکاء نے اپنے ہاتھوں میں تعزیت کے موقع پر استعمال کیے جانے والے زرد رنگ کے chrysanthemum کے پھول بھی پکڑے ہوئے تھے، جن کے ذریعے علامتی طور پر یہ کہنے کی کوشش کی گئی تھی کہ ’آزادیء صحافت کا انتقال‘ ہو گیا ہے۔

روئٹرز کے مطابق چین میں انٹرنیٹ صارفین کو پہلے ہی کافی زیادہ سنسرشپ کا سامنا ہے۔ خاص طور پر اہم ریاستی موضوعات اور انسانی حقوق جیسے حساس معاملات سے متعلق سخت سنسرشپ سے کام لیا جاتا ہے۔

انہی وجوہات کی بنا پر چین میں عالمی سطح پر مشہور اور سماجی رابطوں کے لیے استعمال ہونے والی ویب سائٹس فیس بک اور ٹوئٹر کے علاوہ ویڈیو شیئرنگ ویب سائٹ یوٹیوب پر بھی پابندی ہے۔ چینی صارفین کو ان ویب سائٹس تک رسائی حاصل نہیں ہے۔

(mm / at (Reuters