چَک ہیگل کے مستعفی ہونے کے محرکات

امریکا کے دفاعی اُمور کی وزارت، ری پبلکن چَک ہیگل کو تفویض کیے جانے کے بعد سے ہی ان کے لیے مشکلات کا آغاز ہو گیا تھا۔ اُن کو کانگریس سے منظوری کے سلسلے میں خاصی سخت شنوائی کا سامنا رہا۔ اُن کے ساتھ سینیٹرز نے خاصی تلخ بحث کی۔ ری پبلکن پارٹی کے سینیئر رہنما اور صدارتی الیکشن ہارنے والے جان مککین نے چَک ہیگل کو اسرائیل اور ایران کے حوالے سے اُن کے پرانے مؤقف پر آڑے ہاتھوں لیا۔ بعض ری پبلکن سینیٹرز نے بھی مککین کی بحث کو انتہائی سخت قرار دیا۔

وزارت کا قلمدان سنبھالنے کے بعد وائٹ ہاؤس کے ساتھ چَک ہیگل کے معمول کے تعلقات بتدریج کشیدہ ہوتے چلے گئے۔ یہ صورت حال رواں برس مئی میں خاص نمایاں ہو کر سامنے آ گئی جب نیشنل سکیورٹی ایڈوائزر سمانتھا پاور نے وزیر دفاع کو ایک یاداشات کے ذریعے مطلع کیا کہ وہ گوانتنامو بے کی جیل سے قیدیوں کی منتقلی کے عمل میں سبک رفتاری پیدا کریں۔ مبصرین کے مطابق اوباما کے انتخابی وعدے کی تکمیل کی ڈیوٹی وزیر دفاع کی ہوتی ہے لیکن ایسا نہیں ہو سکا۔

چگ ہیگل کے دور میں ایک اور نزاعی معاملہ انتہا پسند تنظیم اسلامک اسٹیٹ کے ابھرنے کا ہے۔ اِس جہادی گروپ کے خلاف جنگی حکمت عملی مرتب کرنے میں بھی وہ صدر اوباما کی توقعات پر پورا نہیں اُتر سکے۔ عراق و شام میں پھیلی اسلامک اسٹیٹ کے خلاف امریکی کارروائی شروع کرنے کے لیے جو کردار وزیر دفاع کی حیثیت میں چک ہیگل کو ادا کرنا تھا وہ چیئرمین جوائنٹ چیفس آف اسٹاف جنرل مارٹن ڈیمپسی اور صدر اوباما مشترکہ طور پر ادا کرتے رہے۔ اسلامک اسٹیٹ کے حوالے سے امریکی حکمت عمل کو فروغ دینے کے دوران ہیگل تقریباﹰ گُم رہے۔

اسلامک اسٹیٹ کے خطرے سے نمٹنے کے حوالے سے امریکی صدر اوباما کا اٹھائیس اگست کا اعترافی بیان بھی اہم سمجھا گیا۔ اوباما نے کہا تھا کہ اسلامک اسٹیٹ کو کنٹرول کرنے کے لیے امریکا کے پاس کوئی اسٹریٹجی نہیں ہے۔ تجزیہ کاروں کے مطابق اوباما کا یہ بیان واضح طور پر وزیر دفاع پر عدم اطمینان کا عکاس تھا۔ دوسری جانب چَک ہیگل اسلامک اسٹیٹ کے خلاف فوجی قوت کے استعمال پر نا اُمید ہونے کے علاوہ شکُوک و شُبہات رکھتے تھے۔ وہ صدر اوباما کی طرح عراق جنگ کے کڑے ناقدین میں شمار ہوتے تھے۔ بنیادی طور پر اوباما نے چَک ہیگل کو اپنی کابینہ میں خاص طور پر اِس لیے شامل کیا تھا کہ وہ افغان جنگ کو منطفی انجام تک پہنچائیں۔ اِس کے علاوہ امریکی فوجی ہیڈکوارٹرز پینٹاگون کے حجم کو کم کرنا بھی مقصود تھا۔

دوسری جانب زمینی حقائق کچھ اور ہیں۔ مشرق وسطی ٰ اور یورپ میں امریکی فوجی نشانات کے دھندلانے سے قبل ہی حالات نے پلٹا کھایا۔ اگر مشرق وسطیٰ میں انتہا پسند تنظیم اسلامک اسٹیٹ نے عراق و شام کے وسیع علاقے کو روند ڈالا تو یورپ میں روس کی عسکری مہم جوئی نے عالمی منظر کو نئی نا امیدیوں سے دوچار کر دیا۔ ان حالات کے تناظر میں اب اوباما انتظامیہ نئی جغرافیائی و سیاسی تبدیلیوں کے ساتھ قدم ملانے کی کوشش میں ہے۔ کئی ماہرین کا خیال ہے کہ چَک ہیگل اِس صورت حال کے لیے مناسب نہیں ہیں اور اب اوباما کو ایک نئے فعال وزیر دفاع کی ضرورت ہے۔