پنجاب بھر میں ایک ہزار سے زائد گرفتاریاں، انٹرنیٹ سروس معطل

پنجاب پولیس کے مطابق عمران خان کی گرفتاری کے بعد شروع ہونے والے مظاہروں میں اب تک  صوبے بھر می  تقریباً ایک ہزار سے زائد  افراد کو گرفتارکیا جا چکا ہے۔ صوبائی پولیس کے حکام نے بدھ کے روز جاری کیے گئے ایک بیان میں کہا، ''پولیس ٹیموں نے صوبے بھر سے 945 قانون توڑنے والوں اور شرپسندوں کو گرفتار کیا۔‘‘

بیان کے مطابق مظاہرین کے ساتھ جھڑپوں میں پولیس کے  130 افسران اور اہلکار زخمی بھی ہوئے۔

  موبائل انٹرنیٹ اور سوشل میڈٰیا کی بندش

اسی دوران حکومت  نے عمران خان کی گرفتاری کے بعد پرتشدد ماحول میں موبائل انٹرنیٹ اور بڑے سوشل میڈیا پلیٹ فارمز تک رسائی بند کر دی ہے۔ پاکستان ٹیلی کمیونیکیشن اتھارٹی (پی ٹی اے) کے ایک ترجمان نے بتایا کہ وزارت داخلہ کی درخواست پر ٹوئٹر، فیس بک اور یوٹیوب کو بلاک کر دیا گیا۔

انہوں نے کہا کہ یہ واضح نہیں کہ رسائی کب تک محدود رہے گی۔ یہ پابندی  منگل کو تشدد اور فوجی تنصیبات پر حملوں  کے واقعات کی ویڈیوز سوشل میڈیا پر گردش کرنے کے بعد لگانا شرووع کی گئی تھی۔ حکام نے دارالحکومت سمیت بڑے شہروں میں تعلیمی ادارے بھی بند کر دیے۔  عمران خان کو گزشتہ روز بدعنوانی کے الزام میں گرفتار کیا گیا تھا۔ ان کی گرفتاری کے بعد سے پہلے ہی شدید سیاسی اور معاشی مسائل کے شکار ملک میں  پرتشدد مظاہروں کا سلسلہ شروع ہو گیا۔

گزشتہ برس اپریل میں عمران خان کی عدم اعتماد کے ووٹ میں برطرفی کے بعد سے پاکستان شدید سیاسی عدم استحکام کا شکار  ہے۔

ش ر ⁄  ع ت ( اے ایف پی، ڈی پی اے)