پرتشدد مظاہروں پر قابو پانے کے لیے اضافی فورس فرگوسن پہنچ گئی

امریکا میں مظاہروں کا سلسلہ ریاست میسوری کے شہر فرگوسن سے نکلتے ہوئے دیگر شہروں تک پھیل چکا ہے۔ لاس اینجلس اور واشنگٹن ڈی سی میں بھی احتجاج ہو رہا ہے۔ نیویارک میں بھی پولیس کی مشتعل مظاہرین سے مڈ بھیڑ ہوئی ہے۔

متعدد لوگ سیاہ فام غیر مسلح نوجوان مائیکل براؤن کی سفید فام پولیس اہلکار ڈیرن ولسن کے ہاتھوں ہلاکت کو نسلی تعصب کا نتیجہ قرار دے رہے ہیں۔

گرینڈ جیوری کے فیصلے نے براؤن کے خاندان اور ان کے حامیوں کو مایوس کر دیا ہے اور بالخصوص فرگوسن اور سینٹ لوئس میں پرتشدد مظاہرین نے نظام زندگی درہم برہم کر دیا۔

امریکی صدر باراک اوباما نے اس معاملے میں بات چیت کی راہ اپنانے پر زور دیا ہے۔ ان کے اٹارنی جنرل نے وعدہ کیا ہے کہ مائیکل براؤن کی ہلاکت کے معاملے کی وفاقی سطح پر تفتیش کی جائے گی۔ تاہم پولیس اہلکار ڈیرن ولسن کا کہنا ہے کہ ان کا ضمیر صاف ہے۔

فرگوسن میں سخت سکیورٹی کے باوجود، منگل کو شام ہوتے ہی سٹی ہال کے قریب پولیس کی ایک گاڑی کو نذرِ آتش کر دیا گیا تھا۔ پولیس نے مظاہرین کو منتشر کرنے کے لیے آنسو گیس کے شیل فائر کیے۔ بعدازاں مظاہرین پولیس ہیڈکوارٹرز کے قریب جمع ہو گئے۔ ان کا پولیس کے ساتھ تصادم بھی ہوا اور پولیس نے انہیں پیچھے ہٹانے کے لیے کالی مرچ کا پاؤڈر استعمال کیا۔

خبر رساں ادارے روئٹرز کے مطابق منگل کو مظاہرین کی تعداد پیر کے مقابلے میں قدرے کم رہی اور پولیس ان پر قابو پانے میں بھی کامیاب رہی۔ پیر کو ساٹھ سے زائد افراد کو گرفتار کیا گیا تھا جبکہ منگل کی شب یہ تعداد چوالیس رہی۔

سینٹ لوئس کے پولیس سربراہ جون بیلمر نے بدھ کو علی الصبح صحافیوں سے باتیں کرتے ہوئے کہا: ’’عمومی طور پر، یہ رات قدرے پرسکون گزری ہے۔‘‘

انہوں نے بتایا کہ منگل کی شب جلاؤ گھیراؤ اور فائرنگ کے کم واقعات پیش آئے ہیں جبکہ بدامنی کے واقعات بھی چھوٹے گروپوں تک محدود رہے۔

اب سینٹ لوئس میں نیشنل گارڈ کے فوجی پہرہ دے رہے ہیں۔ بعض دکانوں کی حفاظت کے لیے ان کی چھتوں پر لوگ گروپوں کی صورت میں بھی موجود ہیں۔ ان کے پاس آگ بجھانے کے آلات ہیں۔ ان میں سے ایک نے اپنے پاس بندوق کی موجودگی کا اعتراف بھی کیا ہے اور ان کا کہنا ہے کہ وہ ساری رات پہرہ دینے کے لیے تیار ہیں۔