پاکستانی قبائلی علاقے میں جھڑپیں، تین فوجی، 11 عسکریت پسند ہلاک

یہ تازہ لڑائی پاکستانی فوج کی طرف سے کیے جانے والے اس آپریشن کے دوران ہوئی جو افغان صوبے کُنڑ سے جمعہ کے روز سرحد پار کرکے پاکستانی علاقے باجوڑ کے ایک گاؤں بٹوار پر قبضہ کرنے والے عسکریت پسندوں کو نکالنے کے لیے کیا جا رہا ہے۔ پاکستان حکام کے مطابق ان جھڑپوں کے دوران متعدد فوجی لاپتہ بھی ہو گئی ہیں۔

اس لڑائی کے دوران اب تک31 عسکریت پسندوں سمیت 50 سے زائد افراد ہلاک ہو چکے ہیں۔ ہلاک شدگان میں تین فوجی اور پیر کے روز ہلاک ہونے والے امن کمیٹی کے دو ارکان بھی شامل ہیں۔

ایک سینئر سکیورٹی اہلکار نے پشاور میں خبر رساں ادارے اے ایف پی کو بتایا، ’’ باجوڑ کے سرحدی علاقے بٹوار میں جاری جھڑپوں میں آج 11 عسکریت پسند ہلاک جبکہ متعدد زخمی ہوئے۔‘‘ اس اہلکار کے مطابق، ’’تین سکیورٹی اہلکار بھی اس لڑائی میں شہید ہوئے جبکہ متعدد لاپتہ ہیں۔‘‘

اس اہلکار نے مزید بتایا کہ سکیورٹی فورسز نے آٹھ عسکریت پسندوں کو گرفتار کر لیا ہے جبکہ ہلاک ہونے والے عسکریت پسندوں کی لاشیں سکیورٹی فورسز کے قبضے میں ہیں۔

باجوڑ کے مرکزی شہر خار میں تعینات ایک اور حکومتی اہلکار نے بھی نام ظاہر نہ کرنے کی شرط پر اے ایف پی سے بات کرتے ہوئے ہلاکتوں اور جھڑپوں کی تصدیق کی ہے۔

باجوڑ پاکستان کے نیم خودمختار قبائلی علاقے کے سات ضلعوں میں سے ایک ہے۔ ان علاقوں میں طالبان اور القاعدہ سے منسلک شدت پسندوں نے ٹھکانے بنا رکھے ہیں۔

پاکستانی سکیورٹی حکام کے مطابق عسکریت پسند افغانستان سے سرحد پار کرکے پاکستانی سکیورٹی فورسز اور عوام کو نشانہ بناتے رہتے ہیں۔ دوسری طرف افغان حکام کا الزام ہے کہ پاکستانی سکیورٹی فورسز کی طرف سے افغان علاقوں میں گولہ باری کی جاتی ہے۔ دونوں ہمسایہ ممالک کے درمیان اس کے سبب تعلقات کشیدہ ہیں۔

aba/km (AFP)