پاکستان میں مذہبی اقلیتوں کے خلاف انتہاپسند مسلمانوں کی بڑھتی جارحیت

پاکستان کے ایک غیر سرکاری ادارے نیشنل کمیشن برائے انصاف اور امن سے وابستہ پیٹر جیکب کا کہنا ہے کہ پاکستان میں امن و سلامتی کی مجموعی خراب صورت حال کی وجہ سے اقلیتیں اس وقت مسلمان انتہاپسندوں کا نشانہ بن رہی ہیں۔ پیٹر جیکب کے مطابق اقلیتی مذاہب کے پیروکار افراد کی زبردستی تبدیلیٴ دین بھی تواتر سے کروانے کو رپورٹ کیا جاتا ہے۔ موجودہ صورت حال کے تناظر میں تجزیہ کاروں کا خیال ہے کہ شمال مغربی قبائلی علاقے میں طالبان کے خلاف جاری جنگ اور بلوچستان میں قوم پرستوں کی مسلح مزاحمت کی وجہ سے حکام اقلیتوں کے خلاف انتہا پسندوں کی کارروائیوں کو روکنے میں بے بس دکھائی دیتے ہیں۔

ممتاز سیاسی تجزیہ کار ڈاکٹر حسن عسکری رضوی کا خیال ہے کہ پاکستان میں مذہبی اقلیتیں انتہا پسند اور کٹر عقیدے کے حامل مسلمانوں کے مقابلے میں کمزور پوزیشن حاصل کر چکی ہیں اور اسی باعث وہ ان کا نشانہ بن رہے ہیں۔ پاکستان میں ہندوؤں کی اکثریت جنوبی صوبے سندھ میں آباد ہے اور وہ کہتے پھرتے ہیں کہ ان کو مسلمانوں کی جانب سے زمین فروخت کرنے کے دباؤ کا مسلسل سامنا ہے اور وہ باقاعدگی سے ڈرائے دھمکائے بھی جاتے ہیں۔

پاکستانی صوبے سندھ کی ہندو آبادی کا کہنا ہے کہ مسلمان ان کو یہ بھی کہتے ہیں کہ وہ انہیں اپنی زمین بیچ کر بھارت مہاجرت کر جائیں۔ پاکستان ہندو کونسل کے صدر جیٹھ انند کوہستانی کا کہنا ہے کہ رواں برس کے دوران انتہا پسندوں کے مذہبی تعصب کے تناطر میں 1000 سے 1200 ہندو کینیڈا، امریکا اور بھارت نقل مکانی کر چکے ہیں۔

جیٹھ انند کوہستانی کے مطابق سندھ کے ہندو خاندانوں کو انتہا پسند مسلمانوں کے حملوں کا ہر وقت خوف رہتا ہے۔ کوہستانی کا یہ بھی کہنا ہے کہ کون ہے جو اپنا ملک چھوڑنے پر تیار ہے اور ویسے بھی سندھ کی سرزمین تو ان کے لیے دھرتی ماں کی حیثیت رکھتی ہے۔

پاکستان کی ایک اور مذہبی اقلیت احمدی ہے اور وہ اپنی عبادت گاہوں کو مسجد قرار نہیں دے سکتے۔ اس کے علاوہ وہ اپنے عبادت کے مقامات پر قرانی آیات کندہ نہیں کر سکتے۔ اسی طرح احمدیہ لوگ اپنی قبروں پر بھی اسلامی عقائد سے متعلق حروف درج کرنے کی اجازت بھی نہیں رکھتے۔ جماعت احمدیہ کے شعبہ طباعت و اشاعت کے سربراہ اسد اللہ غالب نے بتایا کہ رواں برس پاکستان میں 228 احمدیوں کو ہلاک کیا گیا۔ سن 1984 سے لے کر اب تک 24 مساجد کو مسمار کیا جا چکا ہے۔ احمدیہ کمیونٹی کے ایک اور لیڈر سلیم الدین کا کہنا ہے کہ گزشتہ ایک دو برسوں میں ان کی کی برادری پر کیے جانے والے حملوں میں اضافہ ہوا ہے۔

دوسری جانب حالیہ ایک دو سالوں کے دوران شیعہ مسلمان بھی طالبان انتہاپسندوں کا خاص طور پر نشانہ رہے ہیں۔ ایک محقق حسن مرتضیٰ نے امریکی اخباروں کے سلسلے مک کلاچی (McClatchy) کو بتایا کہ سن 2012 کے دوران 456 سے زائد شیعہ لوگ مارے جا چکے ہیں اور یہ سن 2011 میں ہلاک ہونے والے شیعوں کی تعداد سے دوگنا ہے جبکہ قیام پاکستان کے بعد کسی ایک سال میں ہلاک کیے جانے والے شیعوں کی یہ سب سے بڑی تعداد ہے۔ ایک تنظیم مجلس وحدتِ مسلمین کا کہنا ہے کہ صرف نومبر میں 80 شیعہ ہلاک کیے گئے تھے۔

ah / ij (dpa)