ٹرین حادثے کے ذمہ داروں کو سخت سزا ملے گی، مودی

بھارتی وزیر اعظم نریندر مودی نے ریاست اڑیسہ میں گزشتہ شب  تین ٹرینوں کے درمیان ہونے والے تصادم  کے مقام کا دورہ کیا ۔ مودی نے قریب نصف گھنٹے تک وہاں ہونے والے آپریشن کی تفصیلات کا جائزہ لیا۔ خبر رساں ادارے اے ایف پی کے مطابق بھارتی وزیر اعظم نے فون کے ذریعے نئی دہلی میں موجود حکام کو احکامات بھی دیے۔

اس کے بعد مودی ایک ہسپتال گئے جہاں حادثے کے زخمی زیر علاج ہیں۔ انہوں نے ڈاکٹروں سے صورتحال معلوم کی اور مختلف وارڈز میں جا کر زخمیوں سے ملاقاتیں کیں۔

اس موقع پر بھارتی وزیراعظم نے رپورٹرز کو بتایا کہ یہ دکھ کا لمحہ ہے اور وہ ان لوگوں کی تکلیف محسوس کر رہے ہیں جو اس حادثے میں زخمی ہوئے۔ ان کا کہنا تھا کہ حکومت زخمی ہونے والوں کی ہر ممکن مدد کرے گی اور اس حادثے کے ذمہ داران کو سخت سزا دی جائے گی۔

خیال رہے کہ بھارتی وزیر اعظم آج ہفتہ تین جون کو گوا سے ممبئی تک چلنے والی ایک نئی تیز رفتار ٹرین کا افتتاح کرنے والے تھے۔ اس ٹرین میں ٹکراؤ سے بچاؤ کے لیے جدید نظام نصب کیا گیا ہے۔ تاہم یہ تقریب گزشتہ روز ہونے والے حادثے کے سبب مؤخر کر دی گئی ہے۔

ریسکیو اور تلاش کا آپریشن مکمل

بھارتی ریاست اڑیسہ میں تین مسافر ٹرینوں کے درمیان ہونے والے تصادم کے بعد ریسکیو آپریشن مکمل کر لیا گیا ہے۔ بالاسور میں قائم کیے گئے ایمرجنسی کنٹرول روم کے ایک اہلکار کے مطابق تمام مرنے والوں اور زخمیوں کو حادثے کی جگہ سے نکال لیا گیا ہے۔

اڑیسہ کے ریاستی فائر اینڈ ایمرجنسی ڈیپارٹمنٹ کے ڈائریکٹر سودھانشو سارنگی نے خبر رساں ادارے ایسوسی ایٹڈ پریس کو بتایا، ’’جمعہ کی شب دس بجے تک ہم نے بچ جانے والوں کو وہاں سے نکال لیا تھا۔ اس کے بعد لاشیں نکالنے کا سلسلہ شروع ہوا۔‘‘

ان کا کہنا تھا کہ ہفتے کی صبح تک کم از کم 280 لاشیں وہاں سے نکالی گئیں جبکہ زخمیوں کی تعداد 900 کے قریب ہے۔

ا ب ا/ک م (اے پی، روئٹرز، ڈی پی اے)