ٹرمپ کی توقعات سے بھارتی حکام پریشان

امریکی صدر 24 فروری کو بھارت کے دو روزہ دورے پر آرہے ہیں۔ وہ سب سے پہلے وزیر اعظم نریندر مودی کی آبائی ریاست گجرات کے شہر احمد آباد پہنچیں گے۔ ڈونلڈ ٹرمپ نے کولوراڈو اسپرنگس میں ایک ریلی سے خطاب کرتے ہوئے کہا، ”وزیر اعظم نریندر مودی نے بتایا ہے کہ ہمارے پاس آپ کا خیرمقدم کرنے کے لیے ایک کروڑ لوگ ہوں گے۔"

ٹرمپ نے اس سے قبل ایک پریس کانفرنس میں کہا تھا، ”بھارت ہمارے ساتھ تجارتی محاذ پر اچھا سلوک نہیں کر رہا حالانکہ میں وزیر اعظم مودی کو بہت پسند کرتا ہوں اور انہوں نے مجھ سے کہا ہے کہ ہوائی اڈہ اور پروگرام کے مقام کے درمیان ستر لاکھ لوگ موجود رہیں گے۔"

صدر ٹرمپ کا نیا دعوی ایسے وقت آیا ہے جب احمد آباد میونسپل کارپوریشن نے امریکی صدر کے روڈ شو میں ایک لاکھ تک لوگوں شرکت کرنے کی امید ظاہر کی ہے، جو کہ ٹرمپ کے دعووں کے مقابلے بہت کم ہے۔

24 فروری کو احمد آباد ایرپورٹ پر اترنے کے بعد ٹرمپ اور مودی ہوائی اڈے سے موٹیرا اسٹیڈیم تک تقریبا ً22 کلومیٹر روڈ شوکریں گے اور دنیا کے اس سب سے بڑے نو تعمیر شدہ کرکٹ اسٹیڈیم میں صدر ٹرمپ 'نمستے ٹرمپ‘ پروگرام سے خطاب کریں گے۔ 

یہ گذشتہ برس امریکہ کے ہیوسٹن میں وزیر اعظم مودی کے 'ہاوڈی مودی‘ پروگرام کا جواب ہے۔ ہیوسٹن میں صدر ٹرمپ بھی شامل ہوئے تھے۔ 22 کلومیٹر کے پورے راستے پر 28 اسٹیج تیار کیے گئے ہیں، ان میں سے ہر ایک پر بھارت کے مختلف حصوں کی ثقافتی جھلکیاں پیش کی جائیں گی۔

امریکی صدر کے بیانات اور حقیقی صورت حال کی وجہ سے بھارتی حکام کی پریشانیاں بڑھ گئی ہیں۔ انہیں یہ سمجھ نہیں آرہا ہے کہ ٹرمپ کے خیرمقدم کے لیے ایک کروڑ لوگوں کا انتظام کیسے کیا جائے۔ خیال رہے کہ احمد آباد کی مجموعی آبادی ہی صرف ستر لاکھ کے قریب ہے۔

 صدر ٹرمپ اور ان کے قافلے کی سیکورٹی بھی بھارتی حکام کے لیے سخت پریشانیوں کا سبب ہے۔ بظاہر امریکی صدر اور اُن کے وفد کی سلامتی کو یقینی بنانے کے غیر معمولی انتظامات کیے گئے ہیں۔ احمد آباد کی فضائی حدود کئی گھنٹوں تک ہر طرح کی پروازوں کے لیے بند رہیں گے۔ تمام عمارتوں پر امریکی اسنائپر اور نیشنل سیکورٹی گارڈ کے کمانڈوز تعینات رہیں گے۔ پورے شہر کی ہیلی کاپٹروں اور ڈرون کے ذریعہ نگرانی بھی کی جائے گی۔