’چین سے طلبا کو واپس پاکستان نہ بلانا اچھا فیصلہ‘

چین میں کورونا وائرس کے گڑھ تصور کیے جانے والے صوبے ہوبئی میں پھنسے پاکستانی طالب علموں کے والدین کی طرف سے حکومت سے اپنے بچوں کو ملک واپس بلانے کے پرزور مطالبات کے ایک روز بعد چینی سفارت کار نے اس سلسلے میں اسلام آباد حکام کے فیصلے کی حمایت کر دی ہے۔

پاکستان نے چین میں چین میں مہلک وائرس کورونا سے سب سے زیادہ متاثرہ علاقے میں پھنسے قریب ایک ہزار پاکستانی طلبا کو ملک واپس لانے سے انکار کیا ہے۔ چینی صوبہ ہوبئ اور اس کے دارالحکومت ووہان میں جہاں پاکستانی طلبا پھنسے ہوئے ہیں، وہاں کورونا سے اب تک ہونے والی کُل اموات میں سے دو چوتھائی سے زیادہ اموات واقع ہوئی ہیں۔ سرکاری اعداد و شمار کے مطابق اس فلو نما وائرس سے وہاں اب تک 21 سو سے زائد متاثرین ہلاک ہو چُکے ہیں۔

پاکستان کے جنوبی بندرگاہی شہر کراچی میں صحافیوں سے بات چیت کرتے ہوئے چین کے قونصل جنرل لی بیجیان کا کہنا تھا، ''اگر طلبا کی اتنی بڑی تعداد پاکستان واپس آتی ہے تو اس پر بڑی لاگت کی لاگت آئے گی کیونکہ یہ پاکستانی حکومت کو اس کے بندوبست کے لیے صحت کا ایک بہت بڑا آپریشن کرنا پڑے گا۔ ان طلبا کو الگ تھلگ رکھنے کی موثر سہولیات میسر نہیں ہیں، اس کی وجہ سے پاکستان میں اس وائرس کے پھیلنے کے خدشات بہت زیادہ ہیں۔‘‘ چینی قونصل جنرل نے مزید کہا، '' اس لیے میرا یہ کہنا ہے کہ کورونا کے ایپی سینٹر یا مرکز سے اپنے طلبا کو ملک واپس نہ بلانے کا پاکستانی حکام کا فیصلہ بہت اچھا مگر دشوار ہے۔‘‘

چین کے قونصل جنرل لی بیجیان نے کہا ہے کہ کورونا متاثرین کے لیے چین میں بہتر طبی سہولیات موجود ہیں۔ بیجنگ حکومت انہیں سرجیکل ماسک اور دیگر ضروری اجزاء فراہم کر رہی ہے۔ لی کا کونا تھا، ''ہم ان طلبا کے ساتھ اپنے بچوں جیسا سلوک کر رہے ہیں۔‘‘

بُدھ کے روز پاکستانی طلباء کے والدین نے اس حکومتی فیصلے کے خلاف سخت احتجاج کرتے ہوئے پاکستانی وزیراعظم کے معاون خصوصی زلفی بخاری کی اس سلسلے میں ہونے والی بریفنگ میں شرکت سے انکار کر دیا تھا اور مارگلا روڈ پردھرنا دیتے ہوئے ان والدین نے اپنے بچوں کو واپس بلانے کا مطالبہ جاری برقرار رکھا تھا۔ والدین نے یہ دھمکی دی تھی کہ اگر ان کے بچے تین دن میں واپس پاکستان نہ بلائے گئے تو وہ وزارتوں کے سامنے احتجاج کریں گے اس پر پاکستانی وزیراعظم کے معاون خصوصی زلفی بخاری نے کہا تھا کہ حکومت کو ان والدین کے احساسات و جذبات کا پورا احساس ہے تاہم اُسے قوم کو بھی محفوظ رکھنا ہے۔

دریں اثناء وزیر اعظم کے دفتر سے ملنے والی اطلاعات کے مطابق جمعرات کو پاکستانی وزیر اعظم نے چینی صدر شی جنپنگ کے ساتھ ٹیلی فون پر گفتگو کی تھی اور چینی عوام اور حکومت کے ساتھ اس کٹھن وقت پر اپنی گہری ہمدردی کا اظہار کیا تھا۔

ک م/ ع ب/ ایجنسیاں