نرگس صاحبہ سے معافی چاہتا ہوں، فیاض چوہان

پاکستانی میڈیا کے مطابق پنجاب کے وزیر اطلاعات فیاض چوہان نے ایک ویڈیو پیغام میں کہا کہ لاہور میں ایک ثقافتی شو کے دوران اُن سے اسٹیج شوز میں فحاشی کے حوالے سے سخت سوالات کیے گئے، ’’لہٰذا اس بارے میں بات کرتے ہوئے میری زبان سے نرگس صاحبہ کے بارے میں ایک لفظ نکل گیا جس کو ایک ٹی وی چینل نے ضرورت سے زیادہ بڑھا چڑھا دیا۔‘‘

فیاض چوہان کے مطابق، ’’میں نرگس صاحبہ سے دل سے معافی کا طلب گار ہوں۔ وہ ایک قابل عزت شخصیت ہیں اور پاکستانی فلمی صنعت کی ایک نامور فنکارہ ہیں۔‘‘

پاکستان تحریک انصاف سے تعلق رکھنے والے فیاض الحسن چوہان نئی حکومت کے قیام کے بعد حال میں پنجاب کے وزیر اطلاعات و نشریات بنے ہیں۔ فلم اور اسٹیج فنکارہ نرگس کے بارے میں قابل اعتراض الفاظ انہوں نے لاہور میں منعقدہ ایک تقریب کے دوران ادا کیے تھے۔

خیال رہے کہ چوہان نے بدھ کے روز ملک کے ایک پرائیویٹ ٹیلی وژن کے شو کے بعد ٹی وی عملے کو گالیوں سے نوازا کیوں کہ شو کے دوران ان سے سخت سوالات کیے گئے تھے۔ فیاض چوہان کے ان اقدامات کو سوشل میڈیا پر شدید تنقید کا نشانہ بنایا جا رہا ہے۔