نئے جرمن ڈرائیور کو لائسنس کی خوشی منانی بھاری پڑ گئی

مسئلہ اس وقت ہوا جب ٹریفک پولیس کی جانب سے نصب کیے گئے ایک سپیڈ ٹریکر نے پتہ لگایا کہ نیا کار ڈرائیور جرمن شہر ڈورٹ منڈ کے قریب ایزر لون کے علاقے میں پچانوے کلو میٹر فی گھنٹہ کی اسپیڈ سے گاڑی چلا رہا تھا جب کہ وہاں مطلوبہ اسپیڈ کی حد پچاس کلو میٹر فی گھنٹہ تھی۔

جب پولیس نے اس کار کو روکا تو پتہ چلا کہ ایک اٹھارہ سالہ لڑکا اور اُس کے چار دوست اُسے انچاس منٹ قبل ملے ڈرائیونگ لائسنس کا بظاہر جشن منا رہے تھے۔

اب  نہ صرف اسے 200 یورو جرمانہ ادا کرنا ہو گا بلکہ ڈرائیونگ کے اضافی اسباق کی فیس بھی بھرنی ہو گی۔ علاوہ ازیں اس ٹین ایج ڈرائیور کو کم سے کم ایک ماہ تک موٹر گاڑی نہ چلانے کی پابندی کا  بھی سامنا ہو گا۔

ایک طرف جرمنی جہاں موٹر وے کے بیشتر حصوں پر اسپیڈ کی کوئی قانونی حد مقرر نہ کرنے کے لیے مشہور ہے وہیں ٹریفک پولیس آبادی والے علاقوں میں حدِ رفتار پر مقرر پابندی کا بھی انتہائی سختی سے نفاذ کراتی ہے۔

جرمن ٹریفک کے اس قانون کی خلاف ورزی کرنے والوں کو دس یورو سے چھ سو اسی یورو تک کا جرمانہ ہو سکتا ہے اور کم سے کم تین ماہ کی مدت کے لیے اُن کا ڈرائیونگ لائسنس بھی واپس لیا جا سکتا ہے۔ یہ اس بات پر منحصر ہوتا ہے کہ خلاف ورزی کس پیمانے پر کی گئی ہے۔

ص ح / ع ح ق / نیوز ایجنسی