مہاجرین کے لیے جرمن زبان سیکھنے میں آسانی

 پناہ کے متلاشیوں کے لیے انتظار کی گھڑیاں ختم تو نہیں ہوئی مگر کم ضرور ہوئی ہیں۔ جرمنی میں زبان سکھانے کے ایک ادارے برلٹز کے سربراہ ماتھیاس شوارٹز نے بتایا کہ اب پناہ گزینوں کو زبان سیکھنے کے لیے کسی کورس میں داخلے کی خاطر کئی مہینوں تک انتظار نہیں کرنا پڑتا، ’’ گزشتہ بارہ مہینوں کے دوران اس مدت میں کمی واقع ہوئی ہے اور یہاں تک کے اساتذہ کو تلاش کرنے میں بھی آسانی ہوئی ہے‘‘۔

اس سے قبل مہاجرین اور پناہ گزینوں کی جانب سے بارہا شکایات کی گئی تھیں کہ انہیں جرمن زبان کے کورسز میں جگہ نہیں مل پاتی اور اس کے لیے انہیں کئی کئی مہینوں تک انتظار کرنا پڑتا ہے۔

نصف سے زائد مہاجرین جرمن زبان کے امتحان میں فیل

جرمن زبان بھی سیکھیے اور ہنر بھی، مہاجرین کے لیے خصوصی کورسز

عمر رسيدہ مہاجرين کے ليے جرمن زبان سيکھنا ايک مسئلہ

ماتھیاس شوارٹز سے مزید کہا کہ ہجرت اور پناہ گزین کے جرمن  ادارے (بی اے ایم ایف ) نے بھی اس سلسلے میں فیس اور اخراجات کا دوبارہ سے تعین کیا ہے، ’’اب برلٹز کو جرمن زبان سیکھنے والے ہر طالب علم اور ہر ایک گھنٹے کے لیے تین یورو نوے سینٹ ( 3,90 ) ملتے ہیں۔‘‘ پہلے اس سے ایک یورو کم ادا کیا جاتا تھا۔ انہوں نے مزید بتایا کہ اسی طرح بی اے ایم ایف نے یہ فیصلہ بھی کیا ہے کہ اساتذہ کو ہر تدریسی گھنٹے کا معاوضہ 35 یورو دیا جائے گا، ’’اس کام کے لیے صرف پیسہ ہی واحد کشش نہیں ہے بلکہ اس کے لیے اساتذہ میں ان کے فرائض کے حوالے سے جوش و ولولہ بھی ضروری ہے۔‘‘

گزشتہ برس برلٹز کی جانب سے چار سو مختلف کورسز کے ذریعے  پناہ کے دس ہزار سے زائد متلاشیوں کو جرمن زبان سکھانے کی کوشش کی گئی۔ ماتھیاس شوارٹز کے بقول، ’’انضمام کے کورسس کی وجہ سے ادارے کو مالی فائدہ بھی ہوتا ہے ورنہ ہم ایسا کرتے ہی نہیں۔‘‘