مکان کون خریدے گا؟ نیوزی لینڈ میں نیا قانون

نیوزی لینڈ کی حکومت کی طرف سے جاری کردہ اعدادوشمار کے مطابق ملک میں جائیدادیں خریدنے والے زیادہ تر افراد کا تعلق چین اور آسٹریلیا سے ہے۔ تاہم اس پابندی سے آسٹریلیا کے شہری متاثر نہیں ہوں گے۔

بدھ کے دن نیوزی لینڈ کی پارلیمان نے قانون منظور کیا کہ غیر رہائشی غیرملکی ملک میں کچھ مکانات نہیں خرید سکتے۔ اس قانون کا مقصد مکانات کی قیمتوں کو کنٹرول کرنا بتایا گیا ہے تاہم ساتھ ہی یہ کوشش بھی کی جا رہی ہے کہ نیوزی لینڈ کے شہری اس ملک میں مقیم امیر غیر ملکیوں کے مقابلے میں اپنی قوت خرید کو برقرار رکھ سکیں۔

وزیر اعظم جیسینڈا آرڈن نے اپنی انتخابی مہم میں کہا تھا کہ منتخب ہونے کے بعد وہ گھروں کی بڑھتی ہوئی قیمتوں کو قابو میں لانے کی خاطر اقدامات کریں گی۔ اس قانون کو ان کے اسی انتخابی نعرے کی تعبیر قرار دیا جا رہا ہے۔

آرڈن کی کابینہ میں شامل ایسوسی ایٹ وزیر خزانہ ڈیوڈ پارکر نے کہا ہے کہ اس قانون سازی سے اندازہ ہوتا ہے کہ موجودہ حکومت شہریوں کے ان خوابوں کو سچا کرنے کے لیے ثابت قدم ہے کہ وہ اپنا گھر خرید سکیں۔ انہوں نے اس قانون سازی کو ایک سنگ میل قرار دیا ہے۔

نیوزی لینڈ میں گزشتہ ایک عشرے کے دوران مکانات کی قیمتوں میں ساٹھ فیصد اضافہ ہوا ہے جبکہ آکلینڈ جیسے بڑے شہر میں یہ قیمتیں تقریبا دو گنا ہو چکی ہیں۔ یہ امر اہم ہے کہ گزشتہ کچھ برسوں کے دوران نیوزی لینڈ میں مہاجرت اختیار کرنے والے افراد کی تعداد میں اضافہ ہوا ہے۔

سن دو ہزار سترہ میں نیوزی لینڈ میں مقیم غیرملکیوں کی تعداد اکہتر ہزار نوٹ کی گئی، جس میں بیس فیصد آسٹریلوی، بارہ فیصد چینی اور دس فیصد برطانوی باشندے شامل ہیں۔ اس نئی قانون سازی سے البتہ ایسے آسٹریلوی شہری متاثر نہیں ہوں گے، جو نیوزی لینڈ میں مقیم ہیں۔

نیوزی لینڈ کی حکومت سنگاپور کی حکومت کے ساتھ مذاکرات کر رہی ہے کہ آیا اس کے شہریوں کو بھی اس قانون سے استثنا دے دیا جائے۔ سنگاپور کا نیوزی لینڈ کے ساتھ آزاد تجارت کا معاہدہ بھی ہے، جس کے تحت غیر ملکی ملکیت کی اجازت ہے۔

ع ب / ع ت /  خبر رساں ادارے