موٹروے زیادتی کیس: مجرموں کو موت کی سزا

لاہور کی انسداد دہشت گردی کی ایک عدالت نے ہفتے کی شام موٹروے زیادتی کیس کا فیصلہ سناتے ہوئے اس واقعے میں ملوث مجرموں عابد ملہی اور شفقت علی کو سزائے موت سنائی ہے۔اپنے فیصلے میں عدالت نے دونوں مجرموں کو اغوا، ڈکیتی اور دیگر الزامات ثابت ہونے پر 14 سال قید اور 50، 50 ہزار روپے جرمانے کی سزا بھی سنائی ہے۔ عدالت نے ملزمان کی منقولہ و غیر منقولہ جائیدادیں بحق سرکار ضبط کرنے کا بھی حکم دیا ہے۔

انسداد دہشت گردی عدالت کے جج ارشد حسین بھٹہ نے کیمپ جیل لاہور میں قائم کی گئی خصوصی عدالت میں موٹروے زیادتی کیس کا جب فیصلہ سنایا تو اس وقت کمرہ عدالت میں دونوں مجرمان موجود تھے۔ اس موقعے پر کمرہ عدالت کے باہر اور کیمپ جیل کے آس پاس سخت ترین حفاظتی انتظامات کئے گئے تھے۔ ان علاقوں میں مسلح پولیس اہلکاروں کی بڑی تعداد تعینات کی گئی تھی۔ جبکہ کیمپ جیل کے باہر فیروز پور روڈ کے ایک حصے کو بھی ٹریفک کے ليے بند کر دیا گیا تھا۔

موٹر وے زیادتی کیس: جرائم کو فروغ دینے والا نظام کب بدلے گا؟

اس فیصلے کے حوالے سے ڈی ڈبلیو سے خصوصی گفتگو کرتے ہوئے پاکستان کے ممتاز قانون دان آفتاب باجوہ نے بتایا کہ اس کیس میں نہ صرف جلد فیصلہ سنایا گیا ہے بلکہ تمام قانونی تقاضے پورے کئے گئے ہیں اور ملزم کو صفائے کا پورا موقعہ فراہم کیا گیا ہے۔ ان کے خیال میں اس کیس میں ملزمان کے خلاف شواہد بہت مضبوط ہیں، متاثرہ خاتون نے ملزمان کو شناخت بھی کر لیا تھا اور ڈی این اے بھی میچ کر گیا ہے اس ليے اعلی عدالتوں میں ملزموں کے بچ نکلنے کے امکانات نہیں ہیں۔

ڈی ڈبلیو سے گفتگو کرتے ہوئے عورت فاونڈیشن پاکستان کی ڈائریکٹر پروگرامنگ نے بتایا کہ اجتماعی زیادتی کے ملزمان کو سزا کا ملنا خوش آئند تو ہے اور اس کا کچھ نہ کچھ اثر بھی ضرور ہو گا لیکن صرف ایک کیس میں سزا ملنے سے معاشرے سے عورتوں کے خلاف ایسے جرائم کو ختم نہیں کیا جا سکتا۔

ممتاز مغل کو یقین نہیں ہے کہ اس سزا پر پوری طرح عمل ہو بھی سکے گا یا نہیں کیونکہ ابھی ہائی کورٹ اور سپریم کورٹ میں اپیل کے مراحل باقی ہیں، پاکستان نے جی ایس پی پلس کے معاہدے پر دستخط بھی کر رکھے ہیں اور پاکستان میں سول سوسائٹی کے بعض حلقے یہ سمجھتے ہیں کہ موت کی سزا سے جرائم کے مکمل خاتمے کو یقینی نہیں بنایا جا سکتا۔

ممتاز مغل نے بتایا کہ زینب کیس میں مجرم کو سزائے موت دئیے جانے کے بعد بھی ریپ کے سینکڑوں کیسز سامنے آ چکے ہیں۔ اس لیے ضرورت اس امر کی ہے کہ ریاست ملک میں ایسا ماحول بنائے جس میں عورتوں کے خلاف جرائم میں کمی آئے اس کے لیے ہمیں اپنے تعلیمی نصاب کو بدلنا ہوگا، نوجوانوں کے لیے روزگار اور تفریح کے مواقع پیدا کرنا ہوں گے اور والدین اور اساتذہ سمیت پورے معاشرے کو سرگرمی کے ساتھ اپنا کردار ادا کرنا ہوگا۔

موٹر وے گینگ ریپ: پیمرا کی طرف سے رپورٹنگ پر پابندی کی مذمت

 

سول سوسائٹی نیٹ ورک پاکستان کے سربراہ عبدللہ ملک نے ڈی ڈبلیو کو بتایا کہ اصل سوال یہ ہے کہ سانحہ موٹروے کے موقعے پر موٹروے پولیس ، اداروں میں کورڈینیشن اور انتظامیہ کی کارکردگی کے حوالے سے جو خامیاں سامنے آئیں تھیں کیا ہم نے ان سے سبق سیکھ کر انہیں درست کر لیا ہے۔ ان کے خیال میں جب تک پولیس، پراسیکیوشن اور تفتیش کے علاوہ عدالتی نظام میں بہتری نہیں آتی ایسے جرائم ختم نہیں ہوں گے۔ صرف ایک کیس کی بجائے معاشرے کو ہر کیس کو اسی طرح ٹریٹ کرنا چاہیے۔

اس کیس میں ملزمان کے خلاف تھانہ گجرپورہ میں دہشت گردی سمیت دیگر دفعات کے تحت مقدمہ درج کیا گیا تھا۔ لیکن اس کیس کی غیر معمولی اہمیت کی وجہ سےملزمان کا جیل میں ہی ٹرائل کیا گیا۔ اس کیس میں 40 گواہان کے بیانات قلم بند کیے گئے۔عدالت نے 3 مارچ کو دونوں مرکزی ملزمان عابد ملہی اور شفقت علی پر فرد جرم عائد کردی تھی جبکہ ملزمان نے صحت جرم سے انکار کیا تھا۔

خیال رہے کہ 9 ستمبر 2020 ء کو لاہور- سیالکوٹ موٹروے پر گجرپورہ کے علاقے میں 2 مسلح افراد نے ایک تیس سالہ خاتون کو اس وقت گینگ ریپ کا نشانہ بنایا تھا جب وہ وہاں پٹرول ختم ہو جانے کی وجہ سے گاڑی بند ہونے پر اپنے بچوں کے ہمراہ مدد کی منتظر تھی۔

موٹر وے زیادتی کیس: کیا چیف جسٹس کی تشویش کافی ہے؟

 

 

تنویر شہزاد۔ لاہور