ملائیشیائی مرد کی 11 سالہ تھائی لڑکی سے شادی، عوام میں غصہ

ملائیشیا میں جس مرد نے تھائی لینڈ سے تعلق رکھنے والی گیارہ برس کی کم عمر لڑکی سے شادی کی ہے، اُس کی اپنی عمر اکتالیس برس ہے۔ اس شادی پر ملائیشیائی عوام نے اپنے اس شہری پر خوب لعن طعن کرتے ہوئے اس فعل کی مذمت کی ہے۔ بعض افراد نے شادی کرنے والے شخص کو ایک بچی کے ساتھ جنسی زیادتی کا مرتکب قرار دیا ہے۔
ملائیشیا میں سولہ برس سے کم عمر لڑکی سے شادی کے لیے مذہبی عدالت سے اجازت نامہ ضروری ہوتا ہے اور یہ اجازت حاصل کیے بغیر شادی کی صورت میں اکتالیس سالہ دولہے کو کم سے کم چھ ماہ کی سزا سنائی جا سکے گی اور وہ ہنی مون کے بجائے جیل بھیجا جا سکتا ہے۔
بچوں کے حقوق کے ایک کارکن سید اعظمی علی باشی نے اس شادی کی پرزور مذمت کرتے ہوئے کہا ہے کہ اتنی کم عمر لڑکی سے شادی رچانے والا یقینی طور پر بچوں کے ساتھ زیادتی کرنے والا جنسی مریض ہی ہو سکتا ہے۔ 
عوامی غم و غصے کی گونج حکومتی ایوانوں میں بھی سنائی دی ہے۔ وزیراعظم مہاتیر محمد کی خاتون نائب وزیراعظم وان عزیزہ اسماعیل نے ایک حکومتی اہلکار کو ہدایت کی ہے کہ وہ لڑکی کی ماں سے ملاقات کر کے اس شادی کے حوالے سے رپورٹ انہیں پیش کریں۔
سید اعظمی علی باشی کے مطابق جس مرد نے یہ شادی رچائی ہے، وہ صاحب ثروت تاجر ہے اور اُس کی پہلے سے دو بیویاں ہیں۔ انہوں نے یہ بھی بتایا کہ لڑکی کے والدین غریب ہیں اور وہ ربڑ کے کھیتوں میں مزدوری کر کے گزر بسر کرتے ہیں۔ 
ملائیشیا بنیادی طور پر مسلم اکثریتی ملک ہے اور وہاں ایک مرد بیک وقت چار شادیاں کر سکتا ہے۔ یہ امر اہم ہے کہ ملائیشیا کے عائلی قوانین کے تحت کسی بھی لڑکی کے بالغ ہونے کی عمر سولہ برس رکھی گئی ہے۔ اس سے کم عمر کی لڑکی سے شادی کرنے کے لیے باقاعدہ اجازت حاصل کرنا پڑتی ہے۔ سولہ برس سے کم عمر کی لڑکی سے شرعی نکاح صرف ملائیشیائی مذہبی عدالت کے فتوے پر منحصر ہوتا ہے۔ 
ملائیشیا میں خواتین کے حقوق کے لیے سرگرم کارکنوں اور خاندانی امور کی وزارت کا بھی کہنا ہے کہ اُن کے پاس ایسا کوئی ریکارڈ موجود نہیں کہ سالانہ بنیاد پر کتنے مرد مذہبی عدالت کی باقاعدہ اجازت سے سولہ سال سے کم عمر کی لڑکیوں سے شادی رچاتے ہیں۔ خواتین کے حقوق کے ایک سرگرم کارکن کے مطابق ملائیشیا میں اندازہً پندرہ ہزار لڑکیوں کی شادیاں پندرہ برس یا اس سے کم عمر میں ہو جاتی ہیں۔