مسجد فائرنگ کے ملزم کا اقدام قتل سے انکار

وکیلِ صفائی اُنی فیریس نے خبر رساں ادارے اے ایف پی سے بات چیت میں کہا، ''میرے موکل نے الزامات کو مسترد کیا ہے۔‘‘ ملزم کو آج عدالت میں پیش کیا جا رہا ہے۔ پولیس نے عدالتی کارروائی بند کمرے میں کرنے کی درخواست کر رکھی ہے۔

حملے کے بعد ناروے میں مساجد کی سکیورٹی بڑھا دی گئی

ناورے کے میڈیا نے اس ملزم کی شناخت اکیس سالہ فِلِپ منسہاؤس کے طور پر ظاہر کی ہے۔ زیرحراست ملزم پر الزام ہے کہ اس نے اپنی سترہ سالہ سوتیلی بہن کو قتل کیا اور پھر دارالحکومت اوسلو کے نواحی علاقے میں واقع  النور مسجد میں فائرنگ کی۔ فائرنگ کے دوران مسجد میں موجود ایک پینسٹھ سالہ  شخص نے منسہاؤس کو قابو میں کر لیا تھا، جس کے بعد اسے پولیس کے حوالے کر دیا گیا۔

مشتبہ حملہ آور کو قابو کرنے والے شخص محمد رفیق کا تعلق پاکستان سے ہے اور وہ پاکستانی فضائیہ کا ایک ریٹائرڈ اہلکار ہے۔ اس پاکستانی کو ناورے میں 'ہیرو‘ کہا جا رہا ہے۔

ع ت، ش ج (اے ایف پی، روئٹرز)