ليبيا ميں مخالف مليشيا گروپ جنگ بندی پر متفق

نيوز ايجنسی اے ايف پی کے مطابق جنگ بندی کی تصديق دونوں مخالف مليشيا گروپوں نے بھی کر دی ہے۔ طرابلس کا يہ بين الاقوامی ايئر پورٹ گزشتہ اتوار سے جاری مسلح تصادم کے آغاز ہی سے بند ہے۔ ہوائی اڈے پر گزشتہ تين برسوں سے اسلام پسندوں کے خلاف سرگرم زنتان نامی علاقے کا ايک اعتدال پسند مليشيا گروپ قابض ہے تاہم مسراتا نامی اسلام پسند مليشيا کے شدت پسندوں نے پچھلے اتوار کے روز ايئر پورٹ پر دھاوا بول ديا اور اسی وقت سے وہاں لڑائی جاری تھی۔

طرابلس کے جنوب مغرب ميں واقع زنتان کی فورسز کے ايک کمانڈر مختار لخضر نے بتايا کہ فائر بندی پر اتفاق لوکل گورنمنٹ کونسل کی اتھارٹی کے تحت کيا گيا ہے۔ انہوں نے مزيد بتايا کہ ايئر پورٹ پر راکٹ حملوں کا سلسلہ جمعرات سترہ جولائی کی رات ہی سے بند ہے۔ قبل ازيں پانچ دنوں سے جاری لڑائی اور راکٹ حملوں کے نتيجے ميں ايئر پورٹ کا مرکزی ٹرمينل اور متعدد جہازوں کو بری طرح نقصان پہنچا ہے۔

دوسری جانب مسراتا کے ترجمان احمد حديحہ نے بتايا ہے کہ جنگ بندی صرف ايئر پورٹ پر لاگو ہے جبکہ ديگر مقامات پر کارروائياں جاری رکھی جائيں گی۔

يہ امر اہم ہے کہ زنتان اور مسراتا نامی مليشياؤں نے ليبيا کے سابق آمر معمر قذافی کے خلاف سن 2011 ميں اٹھنے والی حکومت مخالف تحريک ميں اہم کردار ادا کيا تھا۔ تاہم بعد ازاں يہ دونوں ہی گروپ طاقت کے حصول کی دوڑ ميں ايک دوسرے کے سخت مخالف بن گئے۔

ليبيا ميں مخالف مليشياؤں کا بڑھتا ہوا اثر و رسوخ اور طرابلس کے بين الاقوامی ہوائی اڈے پر اس تازہ حملے کے نتيجے ميں ايسے خدشات بڑھ رہے ہيں کہ يہ افريقی ملک ناکام رياست نہ بن جائے۔ ليبيا کی کمزور وفاقی حکومت معمر قذافی کی اقتدار سے عليحدگی کے بعد ہی سے ان مليشياؤں کو کنٹرول کرنے ميں ناکام رہی ہے۔

دريں اثناء جمعرات کے روز ليبيا نے اقوام متحدہ سے باقاعدہ طور پر درخواست کی کہ سکيورٹی دستوں کے قيام اور تربيت کے معاملے ميں طرابلس حکومت کی مدد کی جائے۔ ليبيا کے وزير خارجہ محمد عبدالعزيز نے متنبہ کيا کہ ان کا ملک ’ناکام رياست‘ بننے کے دہانے پر کھڑا ہے۔ انہوں نے اقوام متحدہ کی سلامتی کونسل سے درخواست کی ہے کہ ماہرين کی ايک ٹيم روانہ کی جائے، جو ليبيا کی دفاعی و پوليس فورسز کو تربيت فراہم کر سکے تاکہ وہ ہوائی اڈوں، خام تيل کی فيلڈز و ديگر سرکاری تنصيبات کی حفاظت کر سکيں۔