'لائف لائن‘ پر موجود مہاجرین، چھ یورپی ممالک میں تقسیم

فرانسیسی صدر ایمانوئل ماکروں نے روم میں مسیحیوں کے روحانی پیشوا سے بات کرنے کے بعد کہا کہ یورپی یونین کی چھ رکن ریاستیں جن میں اٹلی، پرتگال اور فرانس بھی شامل ہیں، جرمن این جی او کے ’لائف لائن‘ نامی جہاز پر موجود 233 مہاجرین کو لینے پر تیار ہو گئی ہیں۔

فرانسیسی صدر نے تاہم جرمن این جی او کو بھی ’ قوانین کی خلاف ورزی‘ کرنے کا الزام عائد کرتے ہوئے تنقید کا نشانہ بنایا۔ ماکروں کا موقف تھا کہ این جی او کے جہاز نے مہاجرین کے پاس پہنچ کر اُس وقت مداخلت کی جب لیبیا کی کوسٹ گارڈ امدادی کارروائی شروع کر چکی تھی۔

ماکروں کا کہنا تھا،’’ ہم اس صورت حال کو مستقل طور پر قبول نہیں کر سکتے۔ آخر میں تو ہم سمندری سفر کے خطرات کو کم کرتے ہوئے انسانی اسمگلروں کے ہاتھ ہی میں کھیل رہے ہیں۔‘‘

ایمانوئل ماکروں کا یہ تبصرہ مالٹا کے اس بیان کے بعد سامنے آیا جس میں اُس نے مہاجرین کے جہاز کو صرف اُس صورت میں لنگر انداز ہونے کی اجازت دی تھی اگر یورپی یونین کے ساتھی ممالک بھی اپنا کوٹہ قبول کریں۔

ایک جرمن غیر سرکاری فلاحی تنظیم کا جہاز’لائف لائن‘ گزشتہ ایک ہفتے سے بین الاقوامی پانیوں میں سرگرداں تھا۔ اس جہاز پر حاملہ خواتین اور بچوں سمیت دو سو تینتیس مہاجرین سوار تھے جنہیں سمندر میں ڈوبنے سے بچایا گیا تھا۔ ابتدا میں اٹلی اور مالٹا کی حکومتوں نے جہاز کو اپنے اپنے علاقے میں داخل ہونے سے روک دیا تھا۔

تاہم والیٹا حکومت نے منگل کے روز یورپی ممالک کی جانب سے مدد کے وعدے کے بعد جہاز کو اپنی بندرگاہ پر لنگر انداز ہونے کی اجازت دے دی تھی۔

گزشتہ ہفتے بھی کم و بیش ایسی ہی صورت حال سامنے آئی تھی جب اٹلی نے ایکوئیریس نامی ایک امدادی جہاز کو جس پر کئی سو مہاجرین سوار تھے، اپنی بندرگاہ پر لنگرانداز ہونے سے روک دیا تھا۔ مالٹا کی حکومت نے بھی ان مہاجرین کو قبول کرنے سے انکار کیا تھا۔ بالآخر اسپین نے اس جہاز پر سوار تارکین وطن کو اپنے ہاں اترنے کی اجازت دی تھی۔

ص ح/ ع ا / نیوز ایجنسی