قیدیوں کے تبادلے کی ڈیل پر چیک ہیگل کا دفاع

امریکی وزیر دفاع چیک ہیگل نے بدھ کے دن ہاؤس آرمڈ سروسز کمیٹی کو بتایا کہ امریکی فوجی سارجنٹ بووی بیرگڈاہل کی زندگی کو خطرات لاحق تھے اور صورتحال کی غیر یقینی کو دیکھتے ہوئے ان کے پاس وقت نہیں تھا کہ وہ اس ڈیل سے قبل کانگریس کو مطلع کرتے۔

پانچ گھنٹے دورانیے کی طویل بریفنگ کے دوران ہاؤس آرمڈ سروسز کمیٹی نے ہیگل پر الزام عائد کیا کہ وائٹ ہاؤس نے اس ڈیل سے قبل ممبران پارلیمان کو اعتماد میں نہیں لیا۔ تاہم چیک ہیگل نے ایسے تمام تر الزامات مسترد کرتے ہوئے اصرار کیا کہ یہ ڈیل آئینی تقاضوں کو ملحوظ رکھتے ہوئے کی گئی ہے۔

امریکی وزیر دفاع کا البتہ کہنا تھا کہ امریکی فوج بیرگڈاہل کی رہائی کے لیے اختیار کیے گئے راستے میں ممکنہ طور پر موجود قانونی مسائل کا ایک مرتبہ پھر جائزہ ضرور لے گی۔ ان کا کہنا تھا کہ قیدیوں کے تبادلے کی یہ ڈیل ایک سخت مرحلہ تھا۔ انہوں نے زور دیا کہ بیرگڈاہل طالبان کے ہاتھوں ’یرغمال‘ نہیں تھے بلکہ وہ ایک مسلح تنازعے کے نتیجے میں دشمن کی حراست میں ایک جنگی قیدی بنے ہوئے تھے۔ ہیگل کا کہنا تھا کہ امریکی حکومت کا یہ عہد ہے کہ وہ دشمن کی قید میں اپنے فوجی کو آزادی دلانے کی ہر ممکن کوشش کرے گی۔

یہ امر اہم ہے کہ متعدد ڈیموکریٹ اور ری پبلکن سیاستدانوں نے صدر اوباما کے اس فیصلے کو شدید تنقید کا نشانہ بنایا ہے۔ ان کا کہنا ہے کہ وائٹ ہاؤس نے کانگریس کو تیس دن قبل نوٹیفکشن جاری نہیں کیا تھا کہ وہ یہ ڈیل کرنے جا رہی ہے۔ ان ممبران کا کہنا ہے کہ قیدیوں کے تبادلے کی کسی ڈیل سے قبل اس طرح کا نوٹیفیکشن جاری کرنا ایک قانونی تقاضہ ہے۔

ہاؤس آرمڈ سروسز کمیٹی سے مخاطب ہوتے ہوئے ہیگل نے مزید کہا، ’’سارجنٹ بووی بیرگڈاہل کی ریسکیو کا فیصلہ قانونی تقاضوں کے مطابق ہے اور ہمیں یقین ہے کہ یہ ہمارے ملک اور فوج کے لیے ایک بہترین فیصلہ تھا۔‘‘ انہوں نے یہ بھی کہا کہ صدر اوباما کانگریس کو اس حوالے سے ہونے والی پیشرفت سے واقف رکھتے ہوئے اس ڈیل کو زیادہ بہتر طریقے سے پایہ تکمیل تک پہنچا سکتے تھے لیکن ’صورتحال غیر معمولی‘ تھی اور اگر اس تمام معاملے کو خفیہ نہ رکھا جاتا تو صورتحال خراب بھی ہوسکتای تھی۔

ہیگل کے بقول قطری حکام نے بتایا تھا کہ وقت زیادہ نہیں ہے اور اگر قیدیوں کے تبادلے کی اس ڈیل کو عام کیا گیا تو یہ ڈیل ناکام بھی ہو سکتی ہے۔ یاد رہے کہ اس تمام عمل کے دوران قطر نے ثالثی کا کردار کیا تھا۔

ری پبلکن سیاستدان اور ہاؤس آرمڈ سروسز کمیٹی کے چیئرمین بک مککوئین نے اس ڈیل کو خفیہ رکھنے پر تبصرہ کرتے ہوئے کہا کہ یہ ’انتہائی پریشان کن‘ ہے کیونکہ یوں دہشت گردوں کے ساتھ مذاکرات کی ایک مثال قائم ہو گئی ہے۔ انہوں ںے کہا کہ اب القاعدہ اور دیگر ایسے گروہ امریکی فوجیوں کو اغوا کر کے اپنے مطالبات منوانے کی کوشش کر سکتے ہیں۔