فیس بُک نے شیئرز کی فروخت کا منصوبہ پیش کر دیا

فیس بُک نے توقع ظاہر کی ہے کہ اس منصوبے سے اسے پانچ ارب ڈالر حاصل ہونے کی توقع ہے۔ تجزیہ کار اس حوالے سے دگنی رقوم جمع ہونے کی پیشن گوئی کر چکے ہیں۔ گو کہ سماجی رابطے کی اس ویب سائٹ نے اس حوالے سے کم اندازے ظاہر کیے ہیں، پھر بھی کسی انٹرنیٹ کمپنی کی جانب سے ابتدائی مرحلے میں شیئرز کی یہ سب سے بڑی فروخت ہو سکتی ہے۔

شیئرز کی بیرونی سرمایہ کاروں کو فروخت کے باوجوداختیارات کا مکمل کنٹرول بہت حَد تک فیس بُک کے بانی اور چیف ایگزیکٹو آفیسر مارک زوکربرگ کے پاس ہی رہے گا۔

کمپنی کے 56.9 فیصد ووٹنگ شیئر زوکربرگ کو ہی حاصل رہیں گے۔ اٹھائیس فیصد شیئرز کا اکنامک کنٹرول بھی انہی کے پاس ہوگا، یوں ان کا شمار دنیا کے امیرترین افراد میں ہوگا۔

زوکر برگ نے اس حوالے سے جمع کرائی دستاویز کے ساتھ جاری کیے گئے خط میں کہا: ’’ہم اکثر پرنٹنگ پریس اور ٹیلی وژن جیسی ایجادات کی بات کرتے ہیں، آج ہمارے معاشرے کو ایک اور عروج حاصل ہوا ہے۔ ‘‘

فیس بُک کی ملکیت کے حوالے سے ستائیس سالہ زوکربرگ کی اس حیثیت کا یہ مطلب بھی ہے کہ ان کی کمپنی کو ہرجانوں یا دیگر معاملات کی نگرانی کے لیے بیشتر خودمختار ڈائریکٹرز کی تعیناتی یا بورڈ کمیٹیوں کے قیام کی ضرورت نہیں ہو گی۔

فیس بُک رواں برس کے وسط تک اس مارکیٹ میں داخل ہونے کا ارادہ رکھتی ہے۔ کمپنی نے مارگن اسٹینلے، گولڈمین ساکس اور جے پی مورگن کو مرکزی انڈر رائٹرز کے طور پر مقرر کیا ہے۔ اس مقصد کے لیے فیس بُک کے ساتھ شامل دیگر اداروں میں میرل لنچ، بارکلیز کیپیٹل اور الین اینڈ کمپنی شامل ہیں۔

یہ کمپنی محض آٹھ سال پرانی ہے، ہارورڈ یونیورسٹی کے طالب علم زوکربرگ نے اس کی بنیاد رکھی تھی۔ اس وقت اس کے صارفین کی تعداد 845 ملین ہے۔ گزشتہ برس اسے ایک ارب ڈالر کا منافع حاصل ہوا تھا، جو 2010ء کے مقابلے میں پینسٹھ فیصد زیادہ ہے۔

رپورٹ: ندیم گِل / خبر رساں ادارے

ادارت: عدنان اسحاق