’فوجی بغاوت کے حامی نہیں‘، مصری اپوزیشن

کل پیر کو مصری فوج کی جانب سے سامنے آنے والے ایک بیان میں مصری صدر محمد مرسی کو الٹی میٹم دیتے ہوئے کہا گیا تھا کہ اگر اگلے اڑتالیس گھنٹوں کے اندر اندر سڑکوں پر نکلنے والے کئی ملین لوگوں کے مطالبات پورے نہ ہوئے تو فوج مستقبل کا روڈ میپ تیار کرے گی اور اُس پر عملدرآمد کو یقینی بنائے گی۔

جواب میں کل رات ہی صدر مرسی کی طرف سے کہا گیا کہ ہر اُس بیان کو مسترد کیا جاتا ہے، جس کے نتیجے میں مصری معاشرے میں ’تقسیم اور گہری‘ ہو جائے اور ’سماجی امن کو نقصان پہنچے‘۔ مرسی کی طرف سے مزید کہا گیا کہ فوج کے اس بیان کے لیے صدر کی طرف سے ضروری منظوری نہیں لی گئی۔ اس صدارتی بیان میں زور دے کر کہا گیا کہ قومی مصالحت کی پالیسی جاری رکھی جائے گی۔

خبر رساں ادارے روئٹرز کے مطابق آج مرسی نے مسلسل دوسرے روز آرمی چیف السیسی کے ساتھ ملاقات کی۔ اس موقع پر وزیر اعظم ہشام قندیل بھی اُن کے ہمراہ تھے۔ اس دوران ہونےوالی بات چیت کی تفصیلات جاری نہیں کی گئیں۔

مرسی کے حامی بھی سڑکوں پر نکل کر عہدہء صدارت پر اُن کی موجودگی کے جائز اور قانونی ہونے کا دفاع کر رہے ہیں اور اُن کا کہنا ہے کہ مرسی کو صدارت سے ہٹانے کا کوئی بھی اقدام بغاوت کے مترادف ہو گا۔

اسی دوران مصر کے بڑے اپوزیشن اتحاد نیشنل سالویشن فرنٹ (NSF) نے اپنے ایک بیان میں کہا ہے کہ وہ کسی ’فوجی بغاوت‘ کا حامی نہیں ہے۔ بیان کے مطابق اتحاد یہ سمجھتا ہے کہ فوج کی طرف سے موجودہ بحران کے حل کے لیے اڑتالیس گھنٹے دینے کا یہ مطلب نہیں ہے کہ فوج کوئی سیاسی کردار ادا کرنے کی خواہاں ہے۔

جواب میں فوج نے بھی فوری طور پر واضح کیا ہے کہ ’بغاوت‘ کی کوئی کوشش نہیں ہو رہی اور یہ کہ آرمی چیف عبدالفتح السیسی کے بیان کا مقصد محض ’تمام فریقوں پر یہ زور دینا تھا کہ وہ موجودہ سیاسی بحران کا جلد از جلد کوئی حل تلاش کریں‘۔

اسی دوران متعدد وُزراء مرسی حکومت کا ساتھ چھوڑ چکے ہیں، جن میں سیاحت، ماحول، سرمایہ کاری اور قانونی امور کے وُزراء کے ساتھ ساتھ وزیر خارجہ کمال امر بھی شامل ہیں۔ اسی طرح مقامی میڈیا کے مطابق صدارتی ترجمان ایہاب فہمی اور کابینہ کے ترجمان علاء الحدیدی بھی اپنے عہدوں سے مستعفی ہو گئے ہیں۔ خبر رساں ادارے اے ایف پی کے مطابق مرسی کی مشکلات میں مزید اضافہ ایک مصری عدالت کا آج کا وہ فیصلہ ہے، جس میں پبلک پراسیکیوٹر عبدالمجید کی بحالی کا ذکر ہے، جنہیں مرسی نے نومبر میں سبکدوش کر دیا تھا۔

اُدھر وائٹ ہاؤس کے ایک ترجمان کے مطابق امریکی صدر باراک اوباما نے اپنے مصری ہم منصب کو فون پر زور دے کر کہا ہے کہ اُنہیں تمام مصریوں کی امنگوں پر کان دھرنے چاہییں۔ اوباما نے اُنہیں یہ فون تنزانیہ سے کیا، جو کہ اُن کے دورہء افریقہ کی آخری منزل تھا۔