عراق میں حکومت مخالف مظاہرے، وزیر اعظم کی تنبیہ

خبر رساں ادارے روئٹرز نے بغداد سے موصول ہونے والی رپورٹوں کے حوالے سے بتایا ہے وزیر اعظم نوری المالکی کی حکومت کے خلاف مظاہرے ایک ہفتے سے جاری ہیں۔

ہزاروں مظاہرین کا کہنا ہے کہ شیعہ وزیر اعظم کی حکومت سنی مسلمانوں کے ساتھ امتیازی سلوک روا رکھتے ہوئے ان کے حقوق کو دبا رہی ہے۔ مظاہرین نے یہ الزام بھی عائد کیا ہے کہ وزیر اعظم المالکی کی حکومت ہمسایہ ملک ایران کے زیر اثر آتی جا رہی ہے۔

ان مظاہروں کے تناظر میں اگرچہ وزیر اعظم نوری المالکی نے خبردار کیا ہے تاہم انہوں نے کچھ خواتین قیدیوں کو رہا کرنے کے مطالبے کو تسلیم کر لیا ہے۔

روئٹرز کے مطابق عراق کی اس تازہ ترین صورتحال کی وجہ سے ملک میں شراکت اقتدار کی ’نازک ڈیل‘ متاثر ہو سکتی ہے کیونکہ ملک میں اعتدال پسند طاقت سمجھے جانے والے صدر جلال طالبانی اسٹروک کا شکار ہونے کے بعد اس وقت جرمنی میں زیر علاج ہیں۔

بتایا گیا ہے کہ مغربی صوبے انبار  میں ہزاروں مظاہرین نے شام اور اردن کو جانے والی ایک اہم شاہراہ کو بلاک کیا ہوا ہے۔ یہ صوبہ سنی مسلمانوں کا ایک گڑھ تصور کیا جاتا ہے۔

غیر ملکی عناصر پر الزام

عراقی وزیر اعظم نورالمالکی نے اپنے ایک نشریاتی انٹرویو میں کہا ہے کہ ان مظاہروں کے پیچھے غیر ملکی عناصر کا ایجنڈا کارفرما ہے۔ انہوں نے ان مظاہروں کو غیر آئینی بھی قرار دیا ہے۔

نوری المالکی نے مزید کہا، ’’ جو اس ایجنڈے پر عمل کر رہے ہیں، میں ان سے کہوں گا کہ وہ یہ خیال ہر گز نہ رکھیں کہ اس شاہراہ کو کھلوانے اور اس مسئلے کو حل کرنے میں حکومت کو کوئی مشکل پیش آئے گی۔‘‘ انہوں نے خبردار کیا کہ حکومت اس معاملے پر انتہائی صبر کا مظاہرہ کر رہی ہے۔

دوسری طرف مظاہرین کا کہنا ہے کہ حکومت سنی اقلیت کا ’استحصال‘ بند کرے۔ عراق میں 2003ء میں امریکی اتحادی افواج کے حملے سے قبل آمر صدام حسین کی موجودگی میں وہاں سنی مسلمانوں کا اثر ورسوخ زیادہ تھا۔ سنی مظاہرین کا کہنا ہے کہ ملک میں انسداد دہشت گردی کے قوانین کو ختم کر دیا جائے کیونکہ اسے سیاسی مقاصد کے لیے استعمال کیا جاتا ہے۔

دریں اثناء مظاہرین اور حکومت کے مابین ثالثی مذاکرت کار سنی رہنما خالد الملا نے کہا ہے کہ وزیر اعظم ان کی ایک شرط ماننے پر تیار ہو گئے ہیں، ’’ہماری پہلی ملاقات میں  وزیر اعظم المالکی نے وعدہ کیا ہے کہ وہ جیل میں قید تمام خواتین کے لیے عام معافی کے لیے ایک حکم نامے پر دستخط کر دیں گے۔‘‘ انہوں نے بتایا کہ عراقی جیلوں میں اس وقت 920 خواتین قید ہیں، جن میں سے سات سو آزادی کی اہل قرار دی جائیں گی۔

 (ab/ai (Reuters