شوماخر کو ہسپتال سے گھر منتقل کر دیا گیا

فارمولا ون ریسنگ میں سات مرتبہ چیمپئن بننے کا اعزاز حاصل کرنے والے جرمن ڈرائیور میشائل شوماخر کی منیجر زابینے کیہم نے تصدیق کی ہے کہ انہیں منگل کے دن سوئٹزرلینڈ کے شہر لُوزان میں واقع ایک ہسپتال سے فارغ کر دیا گیا ہے۔ تاہم ان کا کہنا تھا کہ شوماخر کو مکمل بحالی کے لیے ابھی طویل وقت درکار ہو گا۔

نیوز ایجنسی اے ایف پی نے کیہم کے حوالے سے بتایا کہ اگرچہ شوماخر کو سوئس شہر گلینڈ میں واقع ان کے گھر پہنچا دیا گیا ہے لیکن ان کی مکمل صحتیابی سے متعلق مشکل مراحل ختم نہیں ہوئے ہیں۔ 45 سالہ لیجنڈ سابق ڈرائیور شوماخر 29 دسمبر 2013 کو حادثے کا شکار ہوئے تھے۔ ان کے سر پر لگنے والی ایک چوٹ کی وجہ سے ان کے دماغ میں خون جم گیا تھا، جسے ماہر ڈاکٹروں کی ایک ٹیم نے دو آپریشنوں کے بعد نکال لیا تھا۔ یوں وہ انتہائی تشویشناک صورتحال سے باہر نکال لیے گئے تھے۔

اس ابتدائی علاج کے بعد ڈاکٹروں نے انہیں مصنوعی طور پر کومے کی حالت میں رکھا تھا تاکہ ان کے دماغ کی شوزش میں کمی آئے اور وہ تندرستی کی طرف بڑھ سکیں۔ دسمبر میں رونما ہونے والے اس حادثے کے بعد سولہ جون کو پہلی مرتبہ شوماخر کو اس ’مصنوعی کومے‘ کی حالت سے باہر لایا گیا تھا۔ وہ جون سے لُوزان کے ایک ہسپتال میں زیر علاج تھے۔ اس سے قبل انہوں نے تقریبا نصف برس فرانس کے ایک ہسپتال میں گزارا تھا۔

منگل کے دن ہسپتال سے فارغ کیے جانے کے بعد شوماخر کی منیجمنٹ ٹیم نے اس طبی مرکز میں ان کا علاج کرنے والی ٹیم کا شکریہ ادا کیا اور کہا کہ دوران علاج شوماخر کو بہترین ٹریٹمنٹ دیا گیا۔ اس ٹیم نے یہ بھی کہا کہ شوماخر کی صحت سے متعلق امور اور کنبے کی نجی زندگی کا احترام کیا جائے۔ اس بیان میں میڈیا سے بھی درخواست کی گئی کہ وہ شوماخر کی تندرستی کے حوالے سے قیاس آرائیاں مت کرے۔

1991ء میں فارمولا ون ریسنگ میں قدم رکھنے والے جرمن ڈرائیور نے اپنے کیریئر میں مجموعی طور پر91 ریسوں میں کامیابی حاصل کی جبکہ سات مرتبہ چیمپئن بننے کا اعزاز بھی حاصل کیا۔ انہوں نے فیراری ٹیم کی نمائندگی کرتے ہوئے مسلسل پانچ مرتبہ یہ ٹائٹل اپنے نام کرنے کا ریکارڈ بھی بنایا۔

پہلی مرتبہ شوماخر نے2006ء میں 37 برس کی عمر میں کار ریسنگ سے ریٹارمنٹ اختیار کی لیکن اپنے شوق و جذبے کی وجہ سے انہوں نے 2010ء میں واپسی کا ارادہ کیا۔ تاہم کوئی قابل ذکر کارکردگی نہ دکھانے کے باعث دو برس بعد انہوں نے کار ریسنگ کو ہمیشہ کے لیے خیرباد کہہ دیا۔